Pas ambasadorit amerikan Donald Lu, edhe ai britanik Nicolas Cannon ka deklaruar se persona me rrezikshmëri të lartë në Shqipëri lëvizin lirshëm. Gjatë një aktiviteti për mbipopullimin në burgje, ai deklaroi se në vendet e vuajtjes së dënimit janë persona që shkelin ligjin, por jashtë tij janë ata me rrezikshmëri të lartë.
Sipas tij fakti që në burg janë më shumë persona me shkelje të lehta është mjaft shqetësues.
Cannon ka theksuar se “tre mënyrat për të ulur mbipopullimin në burgje janë edhe; krijimi i burgjeve të hapura, Qendrat e shërbimeve komunitare dhe Amendimet që mund të bëhen në kodin e proçedurës penale, për ngritjen e një modeli që bazohet në vlerësimin e rrezikshmërisë”.
Ideale, sipas Cannon do të ishte që sistemi gjyqësor të kishte opsione në lidhje me masat e dënimit dhe ti përdorte siç duhet, sipas kërkesave të paraqitura.
I të njëjtit mendim ka qenë edhe ambasadori i OSBE, Florian Rauning tha se për mbipopullimin në burgje, Gjykatat kanë në dispozicion larmishmëri, por ato përdoren shumë rrallë ku masat e dënimit mbeten dënime me burgim. Rauning ka theksuar domosdoshmërinë e reformës në drejtësi, e cila është çështje kyçe dhe se do të ketë efekte dhe gjithpërfshirje. Ai ka shtuar se, jo gjithçka e zgjidh burgosja dhe se mbipopullimi është rritur ndjeshëm.
