Ka ngjallur një reaksion të paparë politik në Itali, një qëndrim i ambasadorit amerikan në Romë John Phillips, pro referendumit të reformës kushtetuese që po përgatitet.
Ish-lideri i të majtës demokrate, Pierluigi Bersani, është indinjuar aq sa ka thënë: “Nuk po u besoj veshëve”, ndërsa qendra e djathtë ka protestuar në kor, raporton La Repubblica.
Polemika zuri fill kur ambasadori Phillips, duke marrë fjalën në një takim për marrëdhëniet trans-atlantike, mbajtur në Institutin e Studimeve Amerikane në Romë, tha: “Vota Jo në referendumin për reformën kushtetuese do ishte një hap mbrapa për investimet e huaja në Itali”, duke shtuar se “vendimin për këtë sigurisht e kanë italianët. Por vendi duhet të garantojë stabilitet politik. Kështu, 63 qeveri në 63 vjet nuk japin garanci”.
Kjo deklaratë është parë gjerësisht si mbajtje krahu shqeto, mbi një reformë kyç që italianët do ta votojnë në vjeshtë. Dhe ky qëndrim, për Bersanin nuk tolerohet. “Për kë na marrin?”, reagoi ai.
Opozita padyshim ishte akoma më e ashpër. “Zoti ambasador i SHBA-së të shohë punët e tij dhe të mos ndërhyjë”, deklaroi kreu i legistëve, Mateo Salvini, dhe shtoi: “Shpresoj që në vjeshtë të fitojë kandidati Trump, i cili ka garantuar qartë se do shohë vetëm punët e shtëpisë së vet. Nëse për votën Pro qenkan masonët, bankierët dhe fuqitë e mëdha, atëherë akoma më shumë bindem për Jo-në”.
I qartë ishte dhe ish ministri i Brendshëm Renato Brunetta, sot kreu i grupit Forza Italia në Dhomën e Deputetëve: “I kujtojmë ambasadorit amerikan nenin 1 të Kushtetutës sonë: Sovraniteti i përket popullit italian”.
Ndërsa i djathti berluskonian Maurizio Gaspari ishte akoma më i rëndë: “Italia nuk është një koloni, ndaj nuk është detyra e ambasadorit amerikan në Itali të prononcohet mbi referendumin kushtetues”.
Ndryshimet kushtetuese në Itali parashikojnë ndërhyrje serioze në funksionimin e parlamentit, deri tani me dy dhoma me kompetenca të barabarta; në marrëdhëniet mes rajoneve dhe pushtetit qendror, në mënyrën e zgjedhjes së presidentit etj. Dita/d.i.
