Ambasada amerikane paralajmëron qytetarët e saj se mund të ketë dhunë në rast se dënohen të akuzuarit për terrorizëm, procesi ndaj të cilëve është drejt mbylljes në Gjykatën e Krimeve të Rënda.
Ambasada paralajmëron qytetarët e saj që të jenë të kujdesshëm për të shmangur zonën pranë Gjykatës së Krimeve të Rënda si dhe për t’ju shmangur demonstratave apo tubimeve që mund të ndodhin pas publikimit të vendimit.
Sipas ambasadës “grupet ekstremiste kanë kërcënuar me dhunë nëse imamët shpallen fajtor”.
Më tej thuhet se ambasada nuk është në dijeni për ndonjë kërcënim të veçantë kundër qytetarëve apo interesave të Shteteve të Bashkuara.
“Të gjithë vizitorët e SHBA-së ose rezidentë në Shqipëri duhet të jenë të vetëdijshëm për gjendjen e sigurisë lokale. Shqetësimet specifike të sigurisë duhet të adresohen autoriteteve shqiptare të zbatimit të ligjit, të cilët janë përgjegjës për sigurinë e të gjithë vizitorëve në Shqipëri”, thuhet në reagim.
