Në një fjalim të mbajtur me rastin e inaugurimit të godinës së re të sistemit të drejtësisë në vend, e ngarkuara me punë e Ambasadës së Shteteve të Bashkuara, shprehu domosdoshmërinë e të pasurit një drejtësi të pavarur.
Leyla Moses Ones, duke kujtuar votimin e tri viteve më parë, tha se ai konsensus vërtetoi se “çfarë mund të bëjnë udhëheqësit kur punojnë së bashku për të mirën e përbashkët”.
Sipas zyrtares së lartë amerikane, “vettingu ka qenë themeli për pjesën tjetër të reformave. Tani një numër i madh, 15% janë rivlerësuar, disa kanë kaluar dhe shumë kanë dështuar. Kjo përfshin gjyqtarët e lartë dhe Kushtetues”.
Ones iu përgjigj edhe zërave kritikë, edhe pse pa përmenduar emra konkretë, duke thënë se “disa thonë se është problem, por kjo tregon se përse reforma ishte e nevojshme. Sistemi i vjetër ishte i kapur nga korrupsioni dhe ata që veprojnë në hije për të mbajtur Shqipërinë prapa, reforma në drejtësi e theu dhe po ua kthen njerëzve”.
E ngarkuara me punë e Ambasadës së SHBA-së tha ndër të tjera se me ngritjen e SPAK dhe BKH, Shqipëria do të jetë e çliruar nga krimi dhe korrupsioni.
