Ambasada e Shteteve të Bashkuara në Tiranë ka njoftuar lançimin e një platforme të re për ide dhe dialog, e cila do të hapet zyrtarisht më 18 shtator, në një event që përkon me Ditën e Kushtetutës Amerikane.
Eventi do të mbahet këtë të enjte në orën 18:00, dhe do të sjellë në vëmendje rëndësinë e Kushtetutës së SHBA-së dhe vlerave themelore që ajo përfaqëson. Në qendër të diskutimit do të jenë ish-pjesëmarrës të programeve të Departamentit Amerikan të Shtetit, të cilët do të ndajnë përvojat dhe reflektimet e tyre mbi demokracinë, të drejtat e njeriut dhe qeverisjen e mirë.
“Bashkohuni me ne këtë të enjte, më 18 shtator, në orën 18:00, për nisjen e serive tona të reja emocionuese me ish-pjesëmarrës të programeve të Departamentit Amerikan të Shtetit. Në nder të Ditës së Kushtetutës, ky takim do të thellohet në Kushtetutën Amerikane dhe vlerat që ajo përfaqëson. Ejani dhe bëhuni pjesë e kësaj platforme të re për mendim dhe dialog.
Shfleto për të njohur folësit tanë.
Regjistrohu këtu https://docs.google.com/…/1FAIpQLSeoFG…/viewform”, thuhet në njoftim.
Platforma e re pritet të zhvillohet në formën e një serie takimesh, ku folës të ftuar do të nxisin reflektim, debat dhe angazhim qytetar. Nisja e saj në Ditën e Kushtetutës Amerikane i jep ngjarjes një rëndësi simbolike të veçantë, duke theksuar lidhjet e forta midis parimeve themelore të demokracisë dhe përpjekjeve për forcimin e tyre edhe në Shqipëri.
