Amb. Ruse në Tiranë: Rusia nuk do të bllokojë importin e grurit rus në Shqipëri
Ambasada ruse në Tiranë ka reaguar pas debatit se Rusia po ndërpret furnizimin me grurë të Shqipërisë.
Ajo me anë të një deklarate për shtyp thekson se “Në rast se do të merret vendimi për bllokimin e importeve të grurit rus në Shqipëri, mund të themi me siguri të plotë që kjo nuk do të bëhet nga Rusia.”
Ambasada shkruan se “është vendosur ndalimi i eksporteve të prodhimeve bujqësore në Rusi. Ky hap i ndërmarrë në bazë të parimit të reciprocitetit ka qenë një kundërmasë e Rusisë ndaj vendeve që e kanë mbështetur vendimin e Këshillit të Bashkimit Evropian 2015/971 të dt. 22 qershor 2015 për zgjatjen e sanksioneve të paligjshme ekonomike kundër Rusisë, lidhur me të ashtuquajturat “veprime destabilizuese të Rusisë në Ukrainë”, dhe vendimin e Këshillit të Bashkimit Evropian 2015/959 të dt. 19 qershor 2015 për zgjatjen e sanksioneve të paligjshme ekonomike kundër Krimesë dhe Sevastopolit. “.
Duke thënë këtë, ambasada shpreh pra qëndrimin e prerë për mosndërprerjen e furnizimit me grurë nga Rusia ndaj Shqipërisë, nesë kjo e fundit nuk e kërkon vetë.
