Një ndër më të mëdhenjtë e futbollit gjerman, Gerd Myler feston nesër 70-vjetorin, ndërkohë që hije të mëdha trishtimi bien mbi këtë përvjetor për shkak të sëmundjes së Alzheimerit (skleroza multiple) që ka prekur sulmuesin legjendar të mannschaft-it.
Myleri, golat e të cilit ndihmuan Bajernin për të fituar tre tituj të Championes League dhe kombëtaren gjermanoperëndimore për të fituar titullin kampione e botës në vitin 1974, do të kujtohet me ngazëllim nga klubi i tij dhe nga ata mijëra tifozë që patën fatin ta shohin.
Ndërkohë, nuk do të ketë festime zyrtare për një nga futbollistët më në zë të Gjermanisë për shkak të trajtimit mjekësor që Myleri po merr që nga shkurti për shkak të sëmundjes së tij të pashërueshme neurodegjenerative.
“Pa golat e Mylerit, Bajerni nuk do të ishte ky i sotmi”, thotë ikona e futbollit gjerman, Franz Beckenbauer.
Lajmi i sëmundjes së Mylerit, i publikuar nga Bajerni muajin e kaluar, u prit me trishtim nga gjenerata të tëra futbollistësh.
“Gerd Myleri ishte sulmuesi që Gjermania nuk e ka patur kurrë. Ai kishte një mesatare të pabesueshme shënimi të golave, që flet qartë se kush ishte ai. Ai ishte sulmuesi që ne ende nuk e kemi”, thotë trajneri i kombëtares gjermane, Joachim Loew.
Myleri fitoi Kupën e Botës me Gjermaninë Perëndimore në vitin 1974, ndërkohë që është shënuesi më i mirë i të gjitha kohërave për Bundesligën me 365 të tillë në 427 ndeshje.
Një gjahtar absolut golash, me një hap të shkurtër dhe me qendër gravitacionale shumë të ulët, që i jepte mundësinë e shpejtësisë në distanca të shkurtëra, Myleri ishte edhe rekordmeni i golave për Gjermaninë derisa u kalua nga Miroslav Klose, në Kupën e Botës në Brazil 2014.
Njeriu, që Gjermania e kishte epitetuar “bombarduesi i kombit” shënoi 68 gola në 62 ndeshje për Gjermaninë Perëndimore.
“Kam shënuar edhe gola më të mirë, por ai i Kupës së Botës ishte më i rëndësishme për mua”, ka thënë dikur Myleri.
“Pa golat e tij, Bayern Munich dhe futbolli gjerman nuk do të ishte ai i sotmi”, thotë shefi i Bayern Munich, Karl-Heinz Rummenigge.
“Ndoshta nuk do të ketë kurrë një tjetër si Myleri, megjithatë ai ka qenë përherë i rezervuar dhe i thjeshtë, çka më ka surprizuar. Ishte shok fantastik skuadre dhe mik. Ai do të ketë gjithmonë vend në familjen Bayern”, thekson Rummenigge.
“Klubi është gjithçka për mua”, thotë shpesh vetë Myleri.
(Nga Klaus Bergmann)
