Paul Pogba do të rikthehet në stërvitje me Juventusin të hënën.
Trajneri i Juventusit, Massimiliano Allegri, ka thënë se nuk ka kuptim që të flitet për një zëvendësues të mundshëm të Paul Pogbas, përderisa ai edhe më tej është lojtar i ‘Zonjës së Vjetër’.
Të shtunën mbrëma Jose Mourinho tha se do të tentojë që sa më parë të transferojë lojtarin e tij të katërt në United dhe se këtë do ta bëjë para fillimit të sezonit të ri. Por, portugezi nuk foli shumë për Pogban, pasi siç tha ai ‘është lojtar i Juventusit’.
Kjo i ka pëlqyer tej mase edhe Allegrit, i cili konfirmoi se Pogba dhe Evra do të rikthehen në stërvitje të hënën.
“Mourinho me të drejtë nuk flet për Paul Pogban sepse ai është lojtar i Juventusit”, tha Allegri.
“E kam thirrur Pogban së bashku me Patrice Evra që t’i kryejnë detyrat parasezonale të dielën mbrëma, që do të thotë se të hënën do të paraqiten në seancën stërvitore”, shtoi Allegri.
“Nuk ka kuptim që të flasim për një zëvendësues të mundshëm të Paul Pogbas pasi ai edhe më tej është lojtar i Juventusit”, theksoi ndër të tjera italiani. /Express/
