Kreu i Departamentit të Rendit e Sigurisë në PD, Enkelejd Alibeaj, ka denoncuar largimin sipas tij të 7 oficerëve të Policisë së Tiranës, sepse kishin ndaluar kunatin e ministrit të Brendshëm, Saimir Tahiri. Në një deklaratë për mediat nga selia blu, Alibeaj tha se efektivet nuk ishin se “personi që po ndalonin ishte kunati i ministrit, se përndryshe nuk do e kalonin vijën e kuqe”.
Alibeaj thotë se ndryshe sa ka ndodhur me këtë rast, nuk u mor asnjë masë për ngjarjen e një muaji më parë, “ku një biznesmen denoncoi dhunën e ushtruar ndaj tij dhe ndaj djalit të tij, nga policia në qendër të Tiranës”.
DEKLARATA E PLOTE
Një muaj më parë, një biznesmen në Tiranë denoncoi publikisht dhunën e ushtruar ndaj tij dhe ndaj djalit të tij, nga policia në qendër të Tiranës. Gjithçka nisi për një gjobë makine të papaguar. Edhe pse biznesmeni i njohur dëshmoi me prova arrogancën dhe dhunën brutale të policisë, tejkalimin e çdo norme, asnjë masë nuk mori Saimir Tahiri, askush nuk mbajti përgjegjësi.
Po nese dikush, një polic prek kunatin e Saimir Tahirit, ky do të jetë fundi i tij, fundi i karrierës dhe do ta shohë veten në rrugë.
Kjo ka ndodhur këtë fundjavë në Tiranë, ku 7 oficerë policie janë flakur, sepse reaguan ndaj kunatit të Saimir Tahirit, i cili, iu versul policëve me arrogancën tipike të familjarëve të qeveritarëve me pretekstin se po i prishnin qetësinë dhe relaksin në lokalin e tij. Paçka se policia gjendej aty në një aksion, e sinjalizuar për praninë e një personi të armatosur.
Policia nuk e dinte se kishte të bënte me kunatin e Tahirti, dhe nuk e dinte se po kalonte vijën e kuqe. Sepse Tahiri dhe kunati i tij janë përtej vijës së kuqe, ata janë të paprekshëm. Të paprekshëm si njerëzit e Tahirit, jane jo vetëm familjarët e tij, po dhe bandat, trafikantët, rrëmbyesit, grabitësit, e sidomos habilajt, kordinatorët kombetarë të drogës në vend.
Përtej vijës së kuqe dhe të paprekshëm e shohin veten Tahiri e Rama me përgjimet e tyre të paligjshme dhe presionin kriminal ndaj Prokurorisë e gjykatës kur nis hetimi ndaj tyre.
Dy standardet e dëshmuara haptazi nga Saimir Tahiri, ku për dhunën e shëmtuar e brutale ndaj një biznesmeni të rregullt e djalit të tij s’merret asnjë masë, madje pas denoncimit publik vazhdon përndjekja e metejshme ndaj tij, ndaj aktivitetit të tij, dhe nga ana tjetër, për një reagim ndaj kunatit të Saimir Tahirit teksa policia gjendej në aksion, hidhen në rrugë 7 policë, këto dy lloj standardesh janë fytyra e vërtetë e qeverisë, e Tahirit, e Ramës, e kësaj oligarkie që po sundon prej tre vitesh.
Kjo padrejtësi bashkë me burimin e saj që eshtë qeveria, janë drejt fundit.
