Kreu i “Djathtas 1912”, Enkelejd Alibeaj në një lidhje për RTSH 24 ka deklaruar se për Vorën dhe Njësinë 10, rezultati i votimit do duhej të kishte dalë. Ai thekson se e ka të vështirë të kuptojë arsyet, por shton se, dy partitë politike më të mëdha në vend, PS dhe opozita, do duhet që të kishin nxjerrë rezultatet e tyre përsa kohë kanë përfaqësues në këto njësi.
“Për Tiranën prisja që në dy nga njësitë ku votimi elektronik është aplikuar, të kishim një rezultat.
Sipas Kodit Zgjedhor, rezultati do duhej të dilte menjëherë. Ora po shkon 23:00 dhe nuk kemi asnjë rezultat për Njësinë 10. Kemi informacionin e paqartë për Vorën.
Ajo që në njëfarë mënyre e shton mjegullnajën, është fakti që është deklaruar të paktën nga KQZ që do dalë nesër në mëngjes. E kam të vështirë të kuptoj cilat janë arsyet. Për më tepër që edhe përfaqësues të PS janë ata që dolën duke anatemuar KQZ.
Nuk më vjen mirë për të qenë i sinqertë. Në ka një pikë të dhimbshme procesi zgjedhor, është procesi i numërimit. Zhvillohet dhe realizohet vetëm nëpërmjet përfaqësuesve të dy partive kryesore, zhvillohet natën. Nga ajo që komisioneri Celibashi tha, paskemi arritur në një marrëveshje, e kuptoni vetë konkluzionin.
I kuptoj fare mirë sjelljet e dy partive të vjetra, ato që kanë bërë marrëveshjen për Kodin Zgjedhor, që të jenë vetëm ato që t’i numërojnë e vlerësojnë votat. Duhet të jem realist.
Ajo se çfarë secila nga partitë nuk e thonë me forcë, sepse e dëgjova deklaratën e përfaqësueses së PS, dukej si për të larë gojën. Në situatën kur KQZ duhet ta kishte deklaruar rezultatin meqë ato dy parti kanë përfaqësues në atë njësi, secila mund të kishte nxjerrë rezultatin e vetë. Fakti që vetëm flasin, por nuk veprojnë, lënë shumë për të dëshiruar, të paktën për këto dy njësi”, deklaroi Alibeaj.
Pyetur se si e pa pjesëmarrjen në zgjedhje, Alibeaj u shpreh se ka një ulje krahasuar me vitin 2021.
“Shifrat nuk janë opinion. Po të shohësh në faqen e KQZ, rezulton se ka ulje krahasuar me 2021.
Mund të jetë ulje normale edhe për faktin se shqiptarët mund të kenë lënë vendin”, theksoi Alibeaj.
