Enkelejd Alibeaj, nga “Djathtas 1912”, deklaroi se Edi Rama do të donte që protesta qytetare të ishte e dhunshme.
“Kam përshtypjen që Rama do të donte ta kishte protestën e dhunshme. Për faktin sepse në sytë e njerëzve do të krijonte paralelizmin e dhunës së protestave të partive politike. Nga ana e protestuesve, e udhës do të ishte që të mund të shmangeshin aq sa është e mundshme episodet e dhunës. Nëqoftëse policia shkon, provokon dhe i godet, dy duar për një kokë janë. Sovranit i justifikohet gjithçka dhe për mua do të ishte më e mira që të bëhej maksimumi që të mund të shmangeshin edhe këto provokime, edhe ky kurth. Është një lloj kurthi që dëshiron të krijojë Rama. Po ta vini re, ajo se çfarë Rama ka kërkuar gjatë gjithë kësaj kohe ka qenë thjesht dhe vetëm për ta etiketuar si një protestë e afiliuar me Sali Berishën dhe me Partinë Demokratike”, tha Alibeaj në studion e “Puls” nga Bruna Çifligu, në A2CNN.
“Sepse në raportin midis tyre është sigurisht më i fortë. Është më i dobët në raportin me qytetarët, ndaj këshilla është që do duhet që protesta të jetë paqësore, që do të thotë të ketë masivitet. Së dyti, do të uroja që të ndodhte dhe gjëja tjetër: do duhet të kalojë gjithmonë e më tepër në një moment racional, të krijimit, të shpërfaqjes së një lloj platforme politike. Pse dalin njerëzit aty? Çfarë kërkojnë? Një arsye është largimi i qeverisë. Por, tjetra është çfarë do duhet të vijë mbas rrëzimit të kësaj qeverie”, shtoi Alibeaj.
