Lulzim Bashës po i ikin jo vetëm deputetët pro Berishës, por edhe ata të cilët e etiketojnë veten si antiberishist, të cilët po mendojnë të krijojnë një formacion të ri politik.
“Jam larguar nga një grup parlamentar i një partie që është në dorë të Sali Berishës, në të cilën mbizoteron berishizmi. Nëse konsideroni sikurse edhe është në fakt që aty është edhe Lulzim Basha, konsiderojeni që është një shkëputje edhe nga Lulzim Basha”, tha Enkelejd Alibeaj për Top Channel.
Divorci politik i papritur me Lulzim Bashën i dha zë idesë se kishte të bënte me një bashkëpunim të fshehtë mes kryetarit dhe ish-kryetarit të PD-së.
Pak metra nga selia me qira ku qëndron Lulzmi Basha, Enkejeld Alibeaj preferon të mos zbulojë shumë detaje nga krijesa e re që pritet të krijohet megjithëse i ka idetë e qarta për ideologjinë dhe mënyrën e drejtimit.
“Po qe për dëshirë, dëshira ime është që ky formacion politik do të duhet të prezantohet një orë edhe më parë dhe sigurisht edhe në zgjedhjet e pritshme. Kush do të jetë në krye të këtij formacioni politik do të duhet të ketë parasysh këtë gjë në sfidën më të parë politike nëse s’do të jetë i suksesshëm, do duhet të largohet”, theksoi demokrati.
