Deputetët e Partisë Demokratike janë treguar sërish të ftohtë në vendimmarrjet në lidhje me krizën në selinë e PD-së.
Rreth një javë më parë, pasi shumica e konsiderueshme e deputetëve refuzuan t’i bashkoheshin Kuvendit të thirrur nga Komisioni i Rithemelimit, pasi pretendonin se po përballeshin me arrogancë nga anëtarët e Rithemelimit dhe ishin lënë jashtë procesit të zgjedhjeve në degë.
Ndërkohë, të mërkurën në mbrëmje, kreu i Grupit të PD-së, Enkelejd ALibeaj, u dërgoi mesazh deputetëve për të mbledhur grupin dje në mbrëmje. Fokusi i diskutimit ishte diskutimi në lidhje me procesin e zgjedhjes së Presidentit.
Pas këtij mesazhi, disa prej deputetëve reaguan publikisht, ndërsa të tjerët duket se e rezervuan reagimin me akte.
Kështu, anëtari i Komisionit të Rithemelimit, i cili njëkohësisht është edhe nënkryetar i Grupit të PD-së, Luçiano Boçi, doli dje në një deklaratë ku tha se Alibeaj nuk ishte konsultuar me kryesinë e grupit për të vendosur për mbledhjen.
“Zoti Alibeaj ka tagrin e Ramës dhe të Ballës, por nuk ka tagrin e demokratëve, të cilët e kanë shkarkuar atë në Kuvendin e datës 30 prill. Së dyti, mbledhjen e grupit e thërret Kryesia e Grupit dhe jo një deputet, qoftë ai i njohur nga Rama si përfaqësues grupi. Prandaj, nga ky moment, kërkoj në ditët në vazhdim thirrjen e mbledhjes së Kryesisë së Grupit, për të diskutuar e vendosur për mbledhjen e Grupit Parlamentar.
Grupi parlamentar i PD-së nuk mund të mblidhet sa herë e kërkon e kur e kërkon RamaBalla. Ne nuk mund të shkojmë pas qerres së Ramës, çfarëdolloj pamje të ketë ajo. Këtu nuk bëhet fjalë për bojkot. Koha e bojkotit dhe e pazareve ka perënduar. Qëndrimin politik në raport me çështjen e zgjedhjes së Presidentit e vendos Këshilli Kombëtar, si organi më i lartë vendimmarrës politik pas Kuvendit dhe e pasqyron në qëndrim Grupi Parlamentar”, tha Boçi dje.
REAGIMI
Kërkesat e nënkryetarëve që Alibeaj të konsultohej fillimisht me kryesinë e grupit para se ta thërresë, i neglizhoi.
“E çfarë pastaj. Për mbledhje të grupit parlamentar, ka një rregullore që përcakton të drejtat e çdo instance. Në rregullore ka një nen (neni 4) që përcakton se mbledhjet e grupit thirren dhe drejtohen nga kryetari i Grupit Parlamentar. Është një detyrim që do të duhet të ushtrohet nga kryetari i grupit. Ajo që është e rëndësishme, është se për këto çështje, aksionin politik do duhet të dëgjohet zëri i secilit deputet. Në fund, do të ketë një deklarim për shtyp”, tha Alibeaj dje para se të futej në mbledhje.
Por teksa Alibeaj u ngjit në sallën e madhe të mbledhjeve në selinë blu, atij nuk iu bashkuan jo vetëm deputetët e Komisionit të Rithemelimit, por edhe një pjesë tjetër e deputetëve. Nga 35 deputetë që nuk shkuan në Kuvendin e PD ditën e shtunë, dje në mbledhjen e thirrur nga Alibeaj shkuan vetëm 22 deputetë, duke mos plotësuar kështu as kuorumin e nevojshëm për mbledhjen e grupit parlamentar. Ky fakt Alibeajt iu vendos në dukje edhe nga deputeti Ervin Salianji.
“Shoh përpjekje për të ndarë Partinë. Duhet ta shtyjmë mbledhjen dhe të mblidhemi të gjithë. Duhet të ulemi me kryesinë dhe të jenë të pranishëm të gjithë deputetët. Nuk ka sens të kërkohet autorizim për t’u ulur me Ramën dhe nuk ulemi me njëri-tjetrin. Presidenti dhe çdo çështje tjetër duhet të diskutohet në kryesi dhe në grup parlamentar, jo të bëhet fakt i kryer. Reforma Territoriale dhe Zgjedhore, absolute për ne”, tha Salianji.
Pas kësaj situate, Alibeaj vendosi të bëjë sërish një hap pas për ta quajtur atë një mbledhje informuese dhe të merrte vendim që sot të mblidhet me kryesinë e grupit ku bëjnë pjesë Alibeaj, Agalliu, Salianji, Boçi e Pampuri, për të caktuar mbledhjen e radhës gjithëpërfshirëse ditën e hënë.
“Kjo është një mbledhje informuese e kolegëve për mbledhjen e Konferencës së Kryetarëve, duke synuar hapjen e debatit brenda Grupit Parlamentar të PD për procesin e zgjedhjes së Presidentit të Republikës. Sot nuk kemi për të marrë asnjë vendim, sepse mbledhja është me natyrë informale, për informimin tuaj për ecurinë e deritanishme dhe shkëmbimin e mendimeve.
Me disa prej kolegëve kam diskutuar edhe personalisht dhe i di mendimet e tyre, me intereson që vendimin për procesin ta marrim të gjithë bashkë, në një moment tjetër, pasi të kemi ezauruar fazën e marrjes së mendimit të secilit”, tha Alibeaj.
PRESIDENTI
22 deputetët që u mblodhën dje në selinë e PD-së diskutuan edhe për procesin e zgjedhjes së Presidentit. Ata ishin të unifikuar në idenë për të mos bojkotuar procesin. Deputetët thanë se kishin marrë mësime nga 2019, që bojkoti i institucioneve nuk u shërben demokratëve.
Mes komenteve tërhoqi vëmendjen Gazment Bardhi, i cili kundërshtoi idenë e Komisionit të Rithemelimit që për këtë çështje të marrin mendimin e Këshillit Kombëtar.
“Murrizi, Rudina dhe Jozefina, që ne i kishim përballë një vit më parë, do të na diktojnë ne si Grup Parlamentar çfarë vendimi do të marrim. Çështja e Presidentit, është çështje që duhet të diskutohet nga Grupi Parlamentar. Asnjë forum tjetër nuk mund t’i imponohet Grupit Parlamentar. Ato që sot thonë nuk duhet të diskutojë grupi, deri dje thoshin duhet të mblidhet grupi dhe të diskutojë”, tha Bardhi./ Mariglen Kume- Panorama
g.kosovari
