Ministri italian i Punëve të Jashtme, Angelino Alfano theksoi sot se Bashkimi Evropian, me muret e tij, nuk është në pozita për të gjykuar dekretin anti-imigracion të kontestuar, ndërmarrë nga presidenti amerikan, Donald Trump.
“Evropa nuk është në pozita të mira për të dhënë mendimin e saj përsa i përket zgjedhjes së të tjerëve. Ose ne dëshirojmë të harrojmë se në Evropë janë ngritur gjithashtu mure”, deklaroi Alfano në një intervistë për të përditshmen “Il Corriere della Sera”.
“Për më tepër, Italia, kampione e botës për shpëtimin e imigrantëve në Mesdhe dhe për pritjen e refugjatëve, mund të mburret me eksperiencën e saj për të treguar se siguria dhe solidariteti mund të qendrojnë së bashku”, shtoi ai.
“Vizioni ynë është i ndryshëm nga ai i Trumpit dhe ka qenë fitimtar deri tani përsa i përket planit të sigurisë. Asnjë konfuzion mes migracionit dhe kujdesit në raste konkrete”, theksoi kreu i diplomacisë italiane, i cili ka mbajtur postin e ministrit të Brendshëm deri në dhjetor.
Trump nënshkroi të premten një dekret që ndalonte për tre muaj hyrjen në SHBA të shtetasve të shtatë vendeve myslimane si Iraku, Irani, Libia, Somalia, Sudani, Siria dhe Jemeni, duke shkaktuar manifestime dhe reagim ndërkombëtar./ b.d
