E deklamuar si protestë e opozitës, bllokimi i pesë akseve kombëtare sot në mesaditë përfundoi vetëm si një protestë e vetë Bashës, e organizuar nga një pjesë e grupit parlamentarë të PD-së. Duke parë protagonistët e kësaj proteste, ajo që e vu re, ishte jo vetëm mungesa e krerëve të koalicionit opozitarë, por edhe e disa figurave qëndrore të PD-së, si Berisha, Topalli, Ruli etj. Përpjekjet për ta kthyer protestën e opozitës nga një lëvizje politike në një lëvizje me pasoja konfrontimesh civile, duket se nuk merr mbështetje të duhur nga palët e përfshira në këtë protestë. Natyrisht që përtej objektivit që ka çadra për qeveri teknike, secila nga palët ka edhe objektivat e veta që lidhen sa me interesa elektorale aq edhe me interesa më pragmatiste në kuadër të Reformës në Drejtësi, e posaçërisht të vetting-ut.
Është e kuptueshme se Basha po përpiqet ta profilizojë veten si nismëtar i një ‘Republike të Re’. E në këtë kuadër ai po bën përpjekje që të lerë në hijë mjaft prej aleatëve të tij, si dhe disa deputetë të PD-së, që janë ‘jetë e mot’ në politikë e janë arkitektë e përfitues të drejtpërdrejtë nga “Republika e Vjetër”. Natyrisht edhe vetë Basha është produkt i kësaj Republike. Ajo që është lehtësisht e kuptueshme ka të bëjë me faktin se republikat nuk ndryshojnë siç ndryshon moda dhe aq më tepër me një fjalë goje. Kjo bën të qartë se palët mund të bashkohen brenda çadrës për qeverinë teknike, por kur vjen puna te ‘Republika e Re’, secila palë ka të tjera gjëra në mendje nga ato që deklamon Basha. Në këtë kuadër janë të natyrshme edhe dritë- hijet në marrdhëniet mes vetë Bashës me aleatët. Natyrisht që edhe rrugët që ndiqen për të shtrënguar me zor qeverinë që të japë dorëheqje janë të diskutueshme edhe brenda koalicionit opozitar. Kjo bëri që dhe protesta e sotme nga një protestë e opozitës të shkojë në hullitë e një proteste 100% e PD-së.
Mungesa e Berishës, Topallit e figurave të tjera të PD-së në bllokimin e rrugëve nuk është se i bën ata që të mendojnë ndryshe nga Basha, por vetëm sa shpalos se jo të gjitha palët kanë qëllime të njëjta. Përfaqësimi me ndonjë flamur aty këtu e ndonjë partie në koalicion me PD nuk është se zgjeron shumë spektrin e përfaqësimit politik. Mungesa e liderëve të koalicionit opozitar që kanë edhe mandate deputetësh është thjeshtë kuptimplote, pasi për ta egzistopn rreziku që të përballen me proces gjyqësorë, pasi haptazi kanë shkelur ligjet me protestën për të bllokuar rrugët e Shqipërisë. Kjo do ta bënte të pamundur përfshirjen e tyre në listat e kandidatëve për deputet në bazë të ligjit për dekriminalizimin. Rreth kësaj pasigurie vërtiten edhe boshllëqet e theksuara në përfaqësim në aksionin e PD-së për të bllokuar rrugët. Ndaj protesta përfundoi thjeshtë në një qokë të Bashës për të mbajtur me gajret militantët e pakët të PD-së që morën pjesë në këtë protestë.
Armando Meta
