Nga Spartak Ngjela
Kurrë nuk duhet menduar që Reforma në Drejtësi, që sapo u bë pjesë esenciale e Kushtetutës shqiptare, është një akt i veçantë, ose një çast teorik që i takon vetëm drejtësisë.
Ajo erdhi sak në kohe, pikërisht atëherë kur ristrukturimi modern i tregut ballkanik, do ta gjejë shtetin shqiptar me sistem perëndimor. Kurse aleanca e madhe me Amerikën, me seriozitetin tonë profesional, mund të na kthejë në qendër të tregut ballkanik.
Është kjo që domosdoshmërisht kërkon një ristrukturim me reformë perëndimore institucionale të shtetit shqiptar. Prandaj duhet të fillojë reforma institucionale e shtetit shqiptar, sërish me ekspertë të huaj.
Por, me ekspertë që janë aktualisht personalitete në rrafsh botëror. Administrata shqiptare është mbushur me injorantë të diplomuar në pseudouniversitetin Kristal; ajo tani duhet të kthehet me fytyrë nga Perëndimi.
Zoti Kryeminister! E dini që aktualisht Reforma në Drejtësi është preludi i Reformës Institucionale të shtetit shqiptar?
Reforma aktuale është realisht momenti i madh historik, kur shteti shqiptar duhet të fitojë personalitetin e vet, në ndihmë të të gjithë botës shqiptare në Ballkan.
Shqiptarët e kanë ndierë rëndë mungesën e një shteti të drejtë shqiptar. Mungesa e këtij shteti ka lënë pa atdhe pesë milionë shqiptarë të shpërndarë në mënyrë diskriminuese nëpër katër shtete ballkanike.
Shteti i drejtë shqiptar me Shqipërinë në Bashkimin Europian, krijon njëherësh aspiratën e re të shqiptarit. Erdhi koha që historinë reale të Shqipërisë ta mësojë çdo europian, ashtu siç ka qenë.
Nuk kane lënë gjë pa thënë kundër nesh gjymtuesit tanë, me një shtet memec si ky yni. Ishte memec se ka qenë gjithmonë një shtet i padrejtë. Pushtetarët kanë grabitur shqiptarët, dhe kundërshtarët tanë kanë shpifur kundër nesh. Një lojë e shëmtuar njëqindvjeçare kjo.
Aleanca amerikano-shqiptare, e rritur në maja tani, ështe garancia jonë që, pasi të vendosim drejtësinë në Shqipëri, pasi të strukturojmë institucionalisht shtetin shqiptar, me frymë krejt e krejt perëndimore; dhe, pasi të hyjmë në Bashkimin Europian, të fillojmë njëherësh të ristrukturojmë botën tonë shqiptare në Ballkan.
Dhe kjo nuk është më një utopi…
