Albpetrol sh.a njofon se ka përgjedhur studion ligjore ndërkombetare, e cila do të përfaqësojë kompaninë në Arbitrazhin Ndërkombëtar me Bankers Petroleum. “Curtis” është kompania numër 1 në botë për sa i takon Arbitrazhit Nderkombetar.
Konflikti ka lindur në mesin e këtij viti, pasi Albpetrol nuk i ka njohur Bankers Petroleum 220 milionë dollarë shpenzime. Në bazë të raportit të Albpetrol, Tatimet inicuan një pagesë prej 57 milionë dollarësh, që bankers u detyrohej tatimeve, shumë që ka arritur në 75 milionë dollar së bashku me gjobat dhe kamatat.
Pasi tatimet bllokuan llogaritë e Bankers Petroleum, kjo e fundit e çoi çështjen në Gjykatën Ndërkombëtare të Arbitrazhit.
Bankers Petroleum, që shfrytëzon me koncesion zonat naftëmbajtëse të Patos Marinzës, është kompania më e madhe në vend me një xhiro prej 67 miliardë lekësh në 2014 dhe eksportuesi më i madh. Kompania ka raportuar humbje fiskale prej 12.5 miliardë lekësh në 2014-n (rreth 100 mln USD), nga rreth 19.4 miliardë lekë që ishte humbja fiskale e një viti më parë. Që prej fillimit të aktivitetit, kompania nuk ka dalë asnjëherë me fitim sipas konceptit fiskal të kompanive komerciale, që sipas marrëveshjes koncesionare do të duhet të tatohej me 50%. (Rezultati tatimor i shoqërisë nuk llogaritet sipas ligjit ‘Për tatimin mbi të ardhurat’ por, bazuar në Marrëveshjen e Hidrokarbureve lidhur midis Albpetrol sh.a. dhe Bankers miratuar në 2004-n, sipas së cilës rezultati llogaritet pasi nga të gjitha të ardhurat të zbriten të gjitha shpenzimet operative dhe kapitale të bëra nga nënkontraktori). Pikërisht mosnjohja e këtyre shpenzimeve nga kompania shtetërore Albpetrol, që ka lidhur marrëveshjen koncesionare me Bankers, është kthyer në mollën e sherrit mes kompanisë kanadeze dhe autoriteteve shqiptare.
Curtis
E themeluar në vitin 1830, Curtis, Mallet-Prevost, Colt & Mosle LLP, (Curtis) është një nga studiot e para amerikane qe ka zhvilluar praktika ligjore ndërkombëtare.
Curtis përfaqëson kompani ndërkombëtare, institucione financiare, qeveri dhe kompani shtetërore si dhe biznese të medha ose individë me të ardhura të mëdha.
Me 17 zyra në pesë kontinente, dhe mbi 300 avokate “Courtis” është vlerësuar nga revista profesionale dhe organizata të ndryshme si nje nder studiot ligjore lider në fushën e arbitrazhit
Vetëm në dy vitet e fundit, ajo ka përfaqësuar 128 çështje të ndryshme arbitrazhi me vlere totale rreth 100 miliard usd.
Avokatët e Curtis kanë eksperiencë të gjerë, njohin shumë gjuhë dhe janë edukuar në universitetet më të mira në të gjithë botën. (Monitor)
