Pas shkurtimit të vendeve të punës, të kuadër të ristrukturimit, kompania shtetërore e naftës Albpetrol parashikon që të rinisë punësimet. Sipas të dhënave zyrtare, organika e këtij dikasteri në vitin 2018 numëronte 1746 punonjës, ndërkohë që për 2019-ën shoqëria ka parashikuar të organizohet me 1790 vende pune apo 54 punonjës më shumë. Gjatë vitit që lamë pas Ministria e Infrastrukturës dhe Energjisë deklaroi se ristrukturimi i kompanisë kishte si synim përmirësimin e treguesve të punës dhe treguesve ekonomiko financiar të shoqërisë.
Ndërkohë që, pas një analize të thelluar Këshilli Mbikëqyrës i shoqërisë vendosi që Albpetrol sh.a të kalojë përmes një ristrukturimi Organizativ, Strukturor dhe Reduktim të fuqisë punëtore. Sipas ministrisë, deri 5 vite më parë, Albpetrol ishte një kompani e cila rezultonte vetëm me humbje financiare ndërsa kishte në punë mbi 3.000 punonjës, pjesa më e madhe e të cilëve ishin militantë partiakë pa lidhje me funksionin e punës.
Ndërkohë që, në përfundim të procesit të ristrukturimit të shoqërisë, Albpetrol trajtoi financiarisht 459 punonjës të larguar nga puna. Megjithatë, sipas ministrisë, nëse do të hapen vende të reja pune, prioritet do të kenë punonjësit e prekur nga procesi i ristrukturimit nëse plotësojnë kushtet profesionale, duke qenë të gjithë këta punonjës janë vendosur në listat e pritjes.
/a.meta
