Nga Blendi Gashi/
Takimet shpeshta të opozitarëve Isa Mustafa e Albin Kurti, veçanërisht shkuarja e vetëvendosësit në konakun e kreut të LDK-së për bashkim forcash në kundërshtim të Thaçit për idenë e “korrigjimit të kufirit” me Serbinë, por sigurisht edhe rrëzimin e Ramushit nga pushteti, ka ngjallur jo pak reagime, duke ditur armiqësinë mes dy politikanëve dhe akuzave që ata drejtuan mes vete dy vite më parë gjatë qeverisjes së LDK-së, por edhe gjatë bashkëpunimit të pasuksesshëm mes tyre si parti opozitare.
Ky rikthim i miqësisë mes Kurtit e Mustafës nga zyrtarë të partive në fjalë po shihet me syrin e “shpëtimit të territorit”, nga ish-vetëvendosësit po vlerësohet bashkëpunim jo i sinqertë, kurse nga analistët një fije shprese për qytetarët.
Ish-vetëvendosësi Dardan Sejdiu, tani shef i grupit parlamentar të Partisë Socialdemokrate nuk e sheh të sinqertë takimin në fjalë, por më shumë si mobilizim të elektoratit.
“Bashkëpunimi i tyre nuk është i sinqertë, takimet po i bëjnë vetëm për të animuar tifozët e tyre. Kjo nuk është rruga e duhur për të ecur përpara”, ka deklaruar Sejdiu në televizionin Dukagjini.
Faik Krasniqi, njohës i rrethanave politike vlerëson se Vetëvendosje dhe LDK-ja kanë pikëpamje të ndryshme sa i përket ndalimit të presidentit Thaçi rreth çështjes së pazarit me territore.
“Vetëvendosje konsideron që protestat janë rruga e vetme për ta parandaluar Presidentin. Kurse LDK-ja mendon që rruga institucionale është rruga e duhur për ta bërë një gjë të tillë. Prandaj takimi Kurti-Mustafa në një këndvështrim mund të shihet një fije shprese për qytetarët e pashpresë, por qëndrimet e ndryshme që kanë këto dy parti dhe përplasjet e mëhershme e zbehin pak a shumë këtë shpresë”, ka deklaruar Krasniqi për tesheshi.com.
Analisti Haki Abazi, duke vlerësuar takimin mes Kurtit e Mustafës, thotë se bashkimi i opozitës kosovarë është më i domosdoshëm se kurrë më parë, për të parandaluar planet e Thaçit për korrigjim të kufijve.
“Takimi i tyre e ka dërguar një mesazh shprese të qytetarët, sepse është në pyetje interesi i vendit. Mustafa dhe Kurti e kanë pa urgjencën dhe momentin kritik ku jemi, dhe të dytë e kanë ndjerë nevojën dhe fuqinë e bashkimit. Mendoj se takimi përcjell mesazhin për bashkërendim të veprimeve të bllokut opozitar, drejt ndaljes së pazareve për shkëmbim të territoreve”, ka deklaruar Abazi për Telegrafin.
Portali ynë ka tentuar të marrë përgjigje edhe nga deputetë të LDK-së, por ata nuk kanë dashur të flasin rreth takimit të liderit të tyre me Kurtin.
Ndërsa Mustafa e Kurti pas takimit mes tyre kanë deklaruar se do të intensifikojmë bashkëpunimin opozitar në mënyrë që degradimi i qeverisjes dhe rrezikimi i territorit të ndalet sa më shpejtë dhe se vendi ka nevojë për një qeveri të re. /tesheshi.com/ma.me
