Pas rikthimit nga suksesi me kombëtaren portieri i Partizanit, Alban Hoxha deklaron se tashmë është përqendruar te Partizani për të zhvilluar një edicion sa më të mirë me objektiv fitimin e titullit kampion.
“Kualifikimi i Ekipit Kombëtar në finalet e Francë 2016 ishte një ëndërr e bukur të cilën mezi e prisnim të gjithë. Ishin ata djem që shkruajtën historinë, dhe ndihem shumë i lumtur që traineri De Biasi më bëri pjesë e këtij grupi. Falenderoj atë dhe shokët e ekipit për mbështetjen që më dhanë.
Përsa i përket synimeve të Partizanit në kampionatin shqiptar, është ende herët për të folur për Titullin, megjithëse objektivi ynë dihet tashmë, të jemi kampionët e ardhshëm dhe të thyejmë hegjemoninë e Skënderbeut. Besoj se ecuria jonë e deritanishme ka treguar se jemi në rrugën e duhur, por të jemi me këmbë në tokë pasi jo vetëm Bylis por me të gjithë kundërshtarët nuk do të jetë e lehtë për t’u përballur. Forca e ekipit tonë dihet, dhe në çdo ndeshje hyjmë vetëm për rezultat pozitiv.
Skënderbeu është një skuadër me potencial, dhe këtë e ka treguar edhe në këtë sezon për vetë faktin pasi lojtarët kanë 5 vjet bashkëpunim me njëri tjetrin. Përballja me ta do tregojë realisht forcën tonë. Kampionati nuk është i lehtë, është i gjatë dhe kemi mundësi përmirësimi. Në përbërje kemi djem të rinj të cilët po mundohen të ambientohen me njëri tjetrin dhe me emrin e ekipit për të cilin luajnë. Besoj që shumë shpejt do t’ia dalim”tha ai.
