Si pasojë e motit të keq me erëra të forta dhe reshje të dendura shiu do të vazhdojë pezullimi i trafikut detar për çdo mjet lundrues.
Kapiteneria në Vlorë ka pezulluar çdo lundrimin në det të hapur. Lëzivja e tragetëve është pezulluar edhe në Sarandë.
Nga ana e saj, OSHEE ka marrë masat të jetë në dispozicion të situatës së krijuar, duke lënë kështu në terren rreth 600 punonjës.
Situata detare paraqitet e rënduar në Adriatik, ndërsa në zonat bregdetare të Gjirit të Durrësit shpejtësia e erës paraqitet në rritje. Më në thellësi të tokës, situata është normale me reshje jo të dendura shiu të cilat kanë nisur që në orët e para të natës së kaluar.
Mëngjesin e sotëm anija tregtare ‘Envi 1’ që ndodhet në radën e portit paraqiti situatë emergjence, kur si rezultat i forcës detare iu lirua spiranca. Pas ndërhyrjes së ekuipazhit dhe ndihmës së dhënë situata u kthye në normalitet.
Aktualisht, deti regjistron forcën 7-8 ballë me drejtim nga jugu, ndërsa shpejtësia e erës në rritje.
Për shkak të këtyre kushteve atmosferike, edhe 2 tragetet e linjës Bari-Durrës, që duhej të bregëzoheshin në orën 8.00, nuk janë futur ende në ujërat shqiptare.
Drejtoria e Përgjithshme detare bën të ditur se tragetet janë nisur me vonesë nga Bari dhe pritet të mbërrijnë pasditen e sotme, pas orës 15:00. Ndërkohë janë paralajmëruar të gjitha mjetet lundruese të rrisin masat e sigurisë për të shmangur incidentet dhe të mos dalin në det.
Në port është pezulluar aktiviteti në sektorin e ngarkim-shkarkimit.
Kapiteni i Përgjithshëm i Kapitenerive ka urdhëruar pezullimin e anijeve të tonazhit të ulët e të mesëm dhe gjithë sektorit të peshkimit.
Qarqet më të rrezikuara
Sipas emergjencave civile Qarqet më të rrezikuara janë Fieri dhe Vlora. Drejtori i Emergjencave Civile Shemsi Premçi deklaroi se nëse të premten do të vazhdojë procesi mësimor, nxënësit deri në klasat e nënta duhet që të shoqërohen nga prindërit në shkollë.
Edhe Sinoptikanët greke sugjerojnë që nga sot e deri të shtunën pasdite të evitohen lëvizjet në zonën e Greqisë veriore dhe Shqipërisë jugore. Sakis Arnautoglu, sinoptikan i njohur i kanalit shtetëror grek ERT, parashikon që në pak ditë në Shqipërinë e jugut të shkarkohen 500 litra shi në një metër katror.
Probleme në Gjirokastër
Reshjet kanë vijuar gjatë gjithë natës dhe problemet e para raportohen nga qarku i Gjirokastrës. Rruga Gjirokastër-Lugina e Çajupit ka shembje në të gjithë gjatësinë dhe konsiderohet e rrezikshme edhe për shkak të stuhisë.
Probleme në Kukës, probleme në furnizimin me energji
Situata në Qarkun e Kukësit gjatë datës 30.11.2017 ora 08.00 është si më poshtë: Situata klimaterike: Në orët e vona të datës 29.11.2017 e në vazhdim Qarku i Kukësit është përfshirë nga reshje shiu me intensitet mesatar shoqëruar me erëra deri në 12 m/s me drejtim nga Jugu. Temperaturat variojnë minimale 8 Gradë Celsius e aktuale 9.6 Gradë Celsius. Shikueshmëria 7 km. Nga informacionet e marra nga strukturat e emergjencave civile në Bashkitë, institucionet përgjegjëse e verifikimin në vend, aktualisht kemi këtë situatë:
Akset rrugore: Aktualisht të gjitha aktet rrugore që përshkojnë Qarkun e Kukësit janë të qarkullueshme pa probleme. Për shërbimet publike: Aktualisht nuk kemi probleme të veçanta për shërbimet publike. Për energjinë elektrike: Në përgjithësi furnizimi me energji ka qenë normal në të gjithë Qarkun.
Ka probleme në furnizimin me energji elektrike në Nj.A Ujmisht dhe Nj.A Bushtricë, Nj Grykë –Çaj e Nj.A Malzi të Bashkisë Kukës. Ka probleme në furnizimin me energji elektrike në Nj.A Golaj, fshatrat Mujaj, Dajç e Cahan të Nj.A Qendër Krumë të Bashkisë Has. Në Bashkinë Tropojë është pa energji elektrike Nj.A Llugaj. Nga grupet e punës po punohet për eliminimin e avarive.
Komisioni i Emergjencave Civile vazhdon të ndjekë situatat që po zhvillohen, si pasojë e situatës klimaterike duke marrë masat përkatëse.
Për shkak të situatës sinoptike të pritshme sot me datë 30.11.2017 nga Prefekti i Qarkut Kukës janë thirrur në një takim urgjent firmat kontraktore të akseve rrugore në shkallë Qarku së bashku me Komisionin i Emergjencave Civile për të diskutuar situatën aktuale klimaterike e marrjen e masave përkatëse.
a.ç
