Ndërsa lufta e rëndë në Ukrainë hyn në muajin e dytë, tensionet u ndezën në një tjetër rajon ish-sovjetik, ku Azerbajxhani dhe Armenia luftuan në vitin 2020, teksa trupat azerbajxhanas u zhvendosën në territorin e patrulluar nga paqeruajtësit rusë, tha Moska në një deklaratë të shtunën.
Forcat e Azerbajxhanit instaluan një post vëzhgimi, tha ministria ruse, duke shtuar se kishte bërë thirrje për tërheqjen e trupave nga zona. Ministria tha se ngjarjet kishin ndodhur të enjten dhe të premten.
Azerbajxhani hyri në luftë dhe doli fitimtar mbi Armeninë dhe Nagorno-Karabakun në vjeshtën e vitit 2020, duke rimarrë një pjesë të territorit që kishte humbur gjatë një lufte që pasoi rënien e Bashkimit Sovjetik në fillim të viteve 1990.
Por me zotin Putin të preokupuar me luftën në Ukrainë, lëvizjen më të guximshme të politikës së jashtme në mandatin e tij 21-vjeçar në krye të Rusisë, ekspertët e politikës së jashtme thanë se fuqitë e tjera në rajon mund ta trajtojnë situatën si një dritare mundësie.
Ministria e Mbrojtjes e Azerbajxhanit kundërshtoi versionin e ngjarjeve të Moskës. Ministria tha në një deklaratë se njësitë e armatosura “ilegale” armene tentuan një akt sabotimi, por duhej të tërhiqeshin pasi u zbatuan “masa të menjëhershme”.
Arayik Arutyunyan, kreu i republikës së Nagorno-Karabakut, tha se kishte shpallur gjendjen ushtarake, pa përmendur Azerbajxhanin dhe duke specifikuar arsyet.
Në një takim me atashetë ushtarakë, Levon Ayvazyan, një zyrtar ushtarak armen, akuzoi Azerbajxhanin për shkelje të marrëveshjeve të mëparshme, duke thënë se deri më tani “negociatat nuk kanë dhënë rezultate pozitive”.
Të premten, Jalina Porter, zëvendës zëdhënëse në Departamentin e Shtetit të SHBA-së, tha se Shtetet e Bashkuara ishin “thellësisht të shqetësuara për lëvizjen e trupave të Azerbajxhanit në Nagorno-Karabakh”. Në përgjigje, ministria e jashtme e Azerbajxhanit tha se një ent i tillë nuk ekzistonte dhe se Azerbajxhani “është në territoret e tij sovrane”. SOT
