“Edhe pas përfundimit të luftës në Ukrainë, Rusia do të vazhdojë të përbëjë një kërcënim afatgjatë për sigurinë euroatlantike“, tha Sekretari i Përgjithshëm i NATO-s, Mark Rutte, gjatë një konference për shtyp me kancelarin gjerman Friedrich Merz dhe ministrin gjerman të Mbrojtjes, Boris Pistorius, në Berlin.
Rutte theksoi se “aleatët bien dakord që presioni mbi Rusinë duhet të mbahet” dhe njoftoi se samiti i ardhshëm i Aleancës do t’i sjellë Kievit angazhime të reja.
“Aleatët do të angazhohen për t’i ofruar Ukrainës ndihmë afatgjatë. Shtetet e Bashkuara mbeten të domosdoshme për mbrojtjen e Ukrainës. Evropa po e mbështet masivisht Ukrainën në aspektin e financimit, mbështetjes dhe prodhimit industrial të mbrojtjes. Mendoni për Gjermaninë, në aspektin e asaj që po bën në mënyrë bilaterale, por edhe përmes iniciativës çeke për municionet dhe iniciativave të tjera, si dhe duke investuar në bazën industriale të mbrojtjes së Ukrainës: kjo është Evropa. Por edhe Shtetet e Bashkuara. Dhe ne kemi nevojë për të dyja. Edhe pas përfundimit të luftës në Ukrainë, Rusia do të vazhdojë të përbëjë një kërcënim afatgjatë për sigurinë euroatlantike. Aleatët bien dakord që presioni mbi Rusinë duhet të mbahet. Javën tjetër, aleatët do të marrin angazhime për mbështetje të Ukrainës që do të jenë të qëndrueshme, të parashikueshme dhe afatgjata“.
