Transporti i parasë fizike në hyrje-dalje nga Pikat e Kalimit të Kufirit të Republikës së Shqipërisë, është një prej kanaleve kryesore që përdoret për pastrimin e parave në territorin shqiptar.
Alarmi vjen përmes Drejtorisë së Pastrimit të Parave, sipas së cilës kjo lloj shkelje ndodh në masë të konsiderueshme, ndërkohë që deklarimet dhe ndëshkimet për këtë veprën penale të mos-deklarimit janë minimale.
Në qershor të këtij viti, Drejtoria e Përgjithshme e Parandalimit të Pastrimit të Parave, u ka dërguar institucioneve kryesore në vend një studim mbi kanalet me risk më të lartë për veprën penale të pastrimit të parave.
Sipas dokumentit Rreziku-kërcënimi kryesor i identifikuar është produkti kriminal i cili çmohet se buron kryesisht nga, trafikimi i lëndëve narkotike, krime në fushën doganore dhe tatimore (si kontrabanda, fshehja e të ardhurave, mashtrimi me TVSH) dhe korrupsioni, vepra këto që mendohet se dominojnë të ardhurat kriminale Dokumenti vëren se numri i rasteve të dyshimta është mjaft i madh, por hetimi ngelet ende në nivele të ulëta.
Në eficencën e hetimeve ndikon edhe fakti se për një pjesë të konsiderueshme të rasteve nevojitet ekzekutimi i letër porosive nga autoritete e huaja gjyqësore, ekzekutim ky që kryhet me shumë vonesë dhe që ndikon negativisht në hetim duke çuar në marrjen e vendimeve të pushimit apo pezullimit të procedimeve penale.
Ndërkaq, Konfiskimet në zbatim të legjislacionit penal për çështjet e pastrimit të parave janë në nivele minimale, konkludon dokumenti i Drejtorisë së Pastrimit të Parave.
Shqiptarja.com/d.i.
