“Qetësi e rrezikshme” cilësohet situata aktuale sa i takon infetimeve nga HIV-i në botë. Kjo pasi rreziku i ringjalljes së epidemisë globale është mjaft i lartë sipas një studimi të publikuar së fundi nga revista shkencore “The Lancet”.
Në raport thuhet se shtyrja e fondeve të ofruara për luftën kundër HIV-it gjatë viteve të fundit rrezikon përpjekjet për të vënë nën kontroll sëmundjen e AIDS-it, i cila shkaktohet nga HIV.
Në raport thuhet se nëse vijohet me këtë rrugë, nuk është e mundur që deri në vitin 2030 t’i jepet fund epidemisë së HIV-it, ashtu siç synojnë anëtarët e OKB-së.
“Niveli i HIV-it në përgjithësi ka rënë, por kjo rënie është ngadalësuar dhe deri në vitin 2020 do të ketë 500 mijë infektime të reja. Po ashtu është hasur në vështirësi në uljen e nivelit në shtetet në zhvillim dhe në mesin e grupeve margjinale, sidomos tek gratë dhe të rinjtë, të cilët kanë mundësi të kufizuar për t’u qasur në trajtim”, thuhet në raport.
Ekspertët bëjnë thirrje për më shumë bashkëpunim mes stafit shëndetësor dhe më shumë përfshirje të trajtimit të HIV-it në shërbimet shëndetësore.
Rreth 37 milionë persona në botë vlerësohet të jenë bartës të HIV-it ose të sëmundjes AIDS, ndërkaq çdo vit regjistrohen rreth 1,8 milionë raste të reja të kësaj sëmundjeje./a.m.
