Rrjetet sociale kanë zëvendësuar zyrat e shtypit. Pjesa më e madhe e informacioneve mbi jetën sportive dhe jo vetëm të atletëve merren nga postimet që bëhen në Twitter dhe Instagram. Komunikatat zyrtare janë pjesë e historisë dhe tani çdo komunikim kalon nëpërmjet rrjeteve sociale. Për këtë aryse, duket e çuditshme kur një lojtar fshin të gjithë profilet e tij.
I ka ndodhur shumë yjeve gjatë periudhave të vështira (Donnarumma gjatë rinovimit të tij me Milan-in) ose edhe pasi kanë vendosur të tërhiqen, siç ka ndodhur me Victor Valdes. Por kur e bën një nga lojtarët me të mirë të Manchester United, Anthony Martial, shkakton shumë zhurmë.
Për disa arsye: zërat e merkatos, që flasin për një largim të tijin nga “Old Trafford”. Më pas mendohej se me largimin e Jose Mourinho-s, i keqi i radhës, gjithçka do të ishte në rregull. Madje, Solskjaer ka folur në mënyrë direkte, duke theksuar qëllimin e klubit për të rinovuar kontratën e ish-sulmuesit të Monaco-së.
Atëherë, çfarë ka ndodhur? “The Sun” ka folur për një vendim të paparashikuar, por Martial e ka patur një problem gjatë javës së kaluar. Siç i ka ndodhur gjatë verës, ai është kthyer me vonesë nga pushimet. Një gabim që i ka prishur shumë punë me Mourinho-n dhe që mund t’i ketë krijuar probleme të tjera me klubin.
Fshirja e profileve në rrjetet e sociale është një veprim i ngjashëm, por akoma më drastik, me atë të majit të kaluar, kur Martial ka hequr nga profili i tij në Instagram fotografitë që kishin lidhje me eksperiencën e tij te “Djajtë e Kuq”, duke nënkuptuar një largim që nuk erdhi.
Tani tifozët e United nuk e dinë me saktësi se çfarë duhet të presin dhe ndjekin të shqetësuar zhvillimet e situatës. Ashtu si shmë klube të tjerë që interesohen për francezin. “L’Equipe” ka kujtuar se United ka aktivizuar klauzolën e rinovimit të njëanshëm të kontratës, e cila do të skadojë në 2020-ën. Por janari ka ardhur dhe tani mund të ketë ardhur edhe koha për Martial që të largohet përfundimisht nga “Old Trafford”…
/a.rada
