Nga një raportim i partnerëve ndërkombëtarë, iSIGURT.al ngre alarmin e publikimit të mbi 42 mijë videove dhe imazheve me përmbajtje të abuzimit seksual të fëmijëve nga një domein shqiptar.
“Kompleksiteti është që sigurisht që nëse flasim për numër materialesh që janë foto dhe video, ky numër mund të shumfishohet. Është një faqe që është hapur në Shqipëri ose nga të huaj, por që ka aktivitet në Shqipëri dhe faqja përmban materiale të dhunës seksuale për fëmijë. Një grupmoshe që i përket moshës 11 deri në 16 vjeç. Duke qenë se kemi të bëjmë me një numër kaq të lartë, do të thotë që edhe nacionalitetet mund të jenë të ndryshme, por neve nuk shmangim frikën se ka edhe fëmijë shqiptarë”, tha Borjana Dine, psikologe.
Kjo është hera e parë që specialistët ndeshen me një numër kaq të madh publikimi, të materialeve me përmbajtje dhune seksuale ndaj të miturve raportuar edhe policisë.
“AKEP në këtë rast që posedon domenet .al dhe jep liçencat në një farë mënyre, nuk e ka në ligj që të mund të kontrollojë apo të mbyllë materialet që janë brenda këtij domeni. Për sa kohë neve nuk kemi një ligj specifik, bie që neve kemi vështirësi për të punuar si sistem mbrojtës ndaj fëmijëve, por edhe ndaj të rriturve me çështje të tilla”, tha ajo.
Gjatë verifikimit të rastit ku të gjitha materialet janë e publikuara në faqen me domain.AL, tregon se edhe hapësira shqiptare e internetit po shfrytëzohet për shpërndarjen e materialeve të paligjshme. Kjo faqe mund te hapet nga kush do pas asnjë kod sigurie apo regjistrim, duke u kthyer në rrezik për shumë prej të miturve.
