Shpërthimi i Ebolës në Republikën Demokratike të Kongos është tashmë më vdekjeprurësi në historinë e saj, sipas zyrtarëve të shëndetit publik.
Gjithsej 2,325 persona kanë humbur jetën nga virusi që nga shpallja e shpërthimit më 15 maj, duke tejkaluar numrin e viktimave të shpërthimit të vitit 2018-2020 në vend.
Shpërthimi ishte tashmë më i shpejti në rritje i regjistruar ndonjëherë, tha javën e kaluar shefi i OKB-së për çështjet humanitare, Tom Fletcher, duke paralajmëruar se “epidemia po vret një person çdo 30 minuta”.
Instituti i Shëndetit Publik i RD të Kongos tha të dielën se kishte regjistruar 4,945 raste të konfirmuara, përfshirë 101 raste gjatë 24 orëve të mëparshme.
Krahasimisht, pak raste janë identifikuar jashtë vendit: deri më 12 gusht, 20 raste ishin konfirmuar në Ugandën fqinje, ndërsa dy persona ishin trajtuar në Gjermani dhe një rast ishte konfirmuar në Francë.
Megjithatë, ritmi i përhapjes së virusit në RD e Kongos, ku ai është përhapur në gjashtë nga 26 provincat e vendit, është përshkruar si “i jashtëzakonshëm” nga Organizata Botërore e Shëndetësisë.
Sipas Reuters, shpërthimit më vdekjeprurës në botë, atij të viteve 2014-2016 në Afrikën Perëndimore, iu deshën pothuajse pesë muaj për të arritur në 1,000 viktima. Shpërthimi aktual arriti në 2,000 viktima brenda tre muajsh, megjithëse studiuesit thonë se virusi mund të ketë qenë duke u përhapur pa u zbuluar që nga shkurti.
Ky është shpërthimi i 17-të i Ebolës që ka ndodhur në RD e Kongos që nga zbulimi i virusit Ebola 50 vjet më parë. Vitet e konfliktit dhe një popullsi shumë e lëvizshme kanë shtuar vështirësitë e vendit në kontrollin e përhapjes së sëmundjes.
OBSH ka thënë se shpreson ta frenojë përhapjen e sëmundjes brenda tre muajve, por ka paralajmëruar se kjo do të thotë vendosjen e transmetimit nën kontroll dhe jo përfundimin e plotë të shpërthimit.
Autoriteti rregullator i barnave në Mbretërinë e Bashkuar, MHRA, ka dhënë leje që të zhvillohen provat e para te njerëzit për një vaksinë kundër llojit Bundibugyo. Aktualisht nuk ka asnjë vaksinë të miratuar në dispozicion për llojin Bundibugyo të virusit, i cili ka shkaktuar epideminë aktuale, por disa vaksina janë në zhvillim.
Vaksina po krijohet nga një ekip i Universitetit të Oksfordit, bazuar në të njëjtën teknologji të përdorur për vaksinën Oxford-AstraZeneca kundër Covid-19. Tre grupe të tjera po zhvillojnë gjithashtu vaksina të ndryshme kundër llojit Bundibugyo.
