Një agjent i U.S. Immigration and Customs Enforcement (ICE), Cristian Castro, u deklarua sot i pafajshëm ndaj akuzave federale se kishte gënjyer hetuesit e FBI-së për rrethanat në të cilat qëlloi në këmbë një 24-vjeçar venezuelian në Minneapolis.
Castro, 52 vjeç, është vendosur në pushim të papaguar nga detyra dhe është agjenti i parë federal i ndjekur penalisht në nivel federal për një krim të lidhur me Operacionin Metro Surge, gjatë të cilit mijëra forca të armatosura dhe të maskuara u dislokuan në qytete të Minesotës në kuadër të fushatës së administratës së Presidentit Donald Trump për deportime.
Prokurorët federalë pretendojnë se Castro u tha hetuesve se Julio Sosa-Celis dhe persona të tjerë e kishin sulmuar me një fshesë dhe një lopatë bore, duke e detyruar të hapte zjarr. Por autoritetet e kundërshtojnë këtë version.
Sipas Prokurores së Qarkut Hennepin, Mary Moriarty, pamjet e kamerave të sigurisë tregojnë se Castro ishte në këmbë dhe qëlloi nga një distancë e afërt përmes derës së hapur të banesës së Sosa-Celis, duke e plagosur të riun në këmbë. “Z. Castro shpiku një histori për të justifikuar të shtënat në derën e një shtëpie ku kishte shumë njerëz në atë kohë”, tha Moriarty, duke shtuar se plumbi përfundoi në murin e një dhome fëmijësh.
Castro përballet gjithashtu me akuza shtetërore në Qarkun Hennepin për sulm me armë zjarri dhe kallëzim të rremë të një krimi. Autoritetet e Minesotës kanë kërkuar që prej majit të kaluar kthimin e tij nga Teksasi, ku banon, për t’u përballur me procesin gjyqësor. Castro kaloi 90 ditë në një burg të Teksasit pasi Guvernatori republikan Greg Abbott refuzoi të nënshkruante kërkesën për ekstradimin e tij nga Minesota, e drejtuar nga Guvernatori demokrat Tim Walz.
Pak ditë pas lirimit të tij këtë muaj, Castro u arrestua sërish, këtë herë për gjashtë akuza për dëshmi të rreme. Nëse shpallet fajtor, ai mund të përballet me deri në gjashtë vjet burg.
Pas të shtënave të 14 janarit, Castro dëshmoi se kishte qëlluar Sosa-Celis, një shpërndarës venezuelian, pasi ai dhe një tjetër person e kishin sulmuar dhe ishin përleshur me të. Ky version u përsërit më vonë edhe nga ish-Sekretarja e Sigurisë Kombëtare, Christy Noem, dhe zyrtarë të tjerë të administratës Trump. Megjithatë, sipas autoriteteve lokale, pamjet e kamerave të sigurisë nuk e mbështetën këtë version.
Pas publikimit të pamjeve, prokurorët hoqën dorë nga çështja kundër Sosa-Celis. Ndërkohë, zyra e Prokurores së Qarkut Hennepin, Mary Moriarty, vijon hetimet ndaj agjentëve të ICE-së të përfshirë në të shtënat që rezultuan me vdekjen e Renee Goode dhe Alex Petry, të dy shtetas amerikanë, në janar.
