Kanë dalë sot (19 shtator) para Gjykatës së Fierit të akuzuarit për tjetërsimin e mbi 1 mijë hektarëve tokë me dokumente false.
Pas arrestimeve të kryera disa ditë më parë për një çështje pronash në Fier, Prokuroria ka kërkuar caktimin e masës së sigurimit “Arrest në burg” për ish-drejtorin e ASHK-së, Ertis Shehu, dhe personin që dyshohet se ka përfituar pronat. Për një ish-hartograf të ASHK-së është kërkuar një masë më e lehtë sigurie.
Në qendër të hetimit janë gjashtë prona në zonën e Levanit, me një sipërfaqe totale prej rreth 71.7 hektarësh.
Sipas Prokurorisë, dyshohet se këto prona janë regjistruar gjatë vitit 2023 duke përdorur dokumentacion të falsifikuar.
Bëhet fjalë për toka që lidhen me një vendim të vitit 2008, përmes të cilit ishte njohur e drejta e kompensimit për 100 hektarë tokë bujqësore në zonën e Levanit dhe Dërmënasit.
Një prej trashëgimtarëve, E.H., kishte marrë në vitin 2018 një kompensim financiar prej 53.8 milionë lekësh. Megjithatë, sipas hetimit, më vonë ai ka ndjekur procedurat për regjistrimin e gjashtë pronave, të cilat së bashku shtrihen në rreth 71.7 hektarë.
Prokuroria dyshon se në këtë proces kanë pasur rol edhe ish-drejtori i ASHK-së Fier, Ertis Shehu, dhe ish-hartografi i institucionit, duke lehtësuar regjistrimin e pasurive.
Pas regjistrimit, disa prej pronave dyshohet se janë shitur, duke gjeneruar të ardhura të konsiderueshme. Për këtë arsye, hetuesit po verifikojnë edhe transaksionet e kryera, lëvizjen e parave dhe destinacionin e tyre.
Në kuadër të hetimit janë sekuestruar edhe 715.976 euro në llogarinë bankare të E.H., ndërsa janë marrë për verifikim edhe dokumente dhe pajisje elektronike.
Hetimet kanë zbuluar se bëhet fjalë për rreth 1.143 hektarë tokë, një sipërfaqe gjigante që korrespondon me afro 1.600 fusha futbolli standarde, çka e bën këtë një nga çështjet më të mëdha të dyshuara të përvetësimit të pronave në qarkun e Fierit.
Në bashkëpunim me Drejtoritë Vendore të Policisë Tiranë dhe Vlorë, autoritetet ekzekutuan masat e sigurisë personale dhe pasurore ndaj personave nën hetim, ndërsa pritet që Gjykata e Fierit të vendosë mbi vlefshmërinë e arrestimeve dhe vijimin e masave të sigurisë.
Prokuroria dhe policia po vijojnë hetimet për të zbardhur plotësisht skemën e dyshuar të regjistrimit të paligjshëm të pronave.
