Berisha në syrin e ciklonit që krijon vetë.
Një tjetër akuzë për shpifje i vjen Doktor Berishës nga Shkodra. Pas Keti Bazhdarit, kandidates së koalicionit të majtë për bashkinë e Shkodrës, e cila e paditi për shpifje ish-kryeministrin Berisha, kësaj here është rradha e LSI-së që bën të njëjtën gjë.
Dega e kësaj partie në Shkodër e paditi Doktorin për shkak të një shkrimi në gazetën RD që pretendonte blerje votash nga kjo parti. Sipas LSI-së dhe dokumentacionit që ajo dorëzoi në prokurori, bëhej fjalë vetëm për një konkurs rinor, i cili në të kundërt nga çfarë shkruante RD, nuk ka qenë aspak një aktivitet i fshehtë, por tërësisht i hapur dhe publik. Si i tillë, edhe i transmetuar gjerësisht në mediat lokale.
Ajo që bën përshtypje në këtë rast është fokusimi i fortë i Berishës në Shkodër. Sinjalet që vijnë nga qyteti më i madh i veriut, i konsideruar si një bastion i fortë i të djathtës, janë të këqija për të djathtën. Në të paktën dy sondazhe jopublikë, të të dy kampeve të politikës, diferencat janë pothuaj të pandjeshme dhe gara është e hapur.
Një humbje e mundshme në Shkodër do ta godiste rëndë opozitën shqiptare e cila një situatë shumë herë më të rëndë e sheh në të gjithë Shqipërinë. Ndaj, përpjekja për deligjitimimin e garës së Shkodrës që ka nisur prej kohësh, më shumë se për ngjarje konkrete ka për synim të justifikojë një humbje të mundshme në të nesërmen. Qoftë dhe nëpërmjet lajmeve të fabrikuara, siç pretendon e majta, që duket se ka zgjedhur që mbas çdo rasti të tillë, të drejtohet në prokurori dhe të verë në dijeni edhe OSBE/ODIHR-in.
