E deleguara politike për diasporën në PD, Jozefina Topalli, ka akuzuar ditën e sotme se dorëzimi i votave të emigrantëve ka dalë jashtë kontrollit.
Sipas Topallit, punonjësja e Ambasadës në Itali, Marjeta Mikeli ka mbledhur zarfet në mënyrë te paligjshme.
Një fakt që Mikeli e konsideron shpifje. Përmes një reagimi në rrjetet sociale, kjo e fundit ka deklaruar se këto pretendime janë plotësisht të pavërteta dhe të pabazuara, ndërsa ngjajnë me fletërrufetë e kohës së shkuar.
“Asnjëherë, në asnjë moment dhe në asnjë formë nuk kam qenë e përfshirë në ndonjë veprim apo proces që bie ndesh me ligjin apo që cenon integritetin e procesit zgjedhor” shkruan Mikeli, teksa shton se duke qënë se kjo përdorje mediatike e emrit të saj ka prekur familjarët e të afërmit në ditët në vazhdim do t’i drejtohet organeve kompetente.
Unë, Marjeta Mikeli, dëshiroj të bëj një sqarim publik në lidhje me përmendjen e emrit tim nga zonja Jozefina Topalli në një konferencë për mediat në kontekstin e pretendimeve për përfshirje në grumbullimin e zarfeve të votuesve të diasporës.
Deklaroj qartë dhe prerë se këto pretendime janë plotësisht të pavërteta dhe të pabazuara. Asnjëherë, në asnjë moment dhe në asnjë formë nuk kam qenë e përfshirë në ndonjë veprim apo proces që bie ndesh me ligjin apo që cenon integritetin e procesit zgjedhor.
Si punonjëse e Ambasadës shqiptare në Itali, kam ushtruar dhe vijoj të ushtroj detyrën time me përgjegjësi, korrektësi dhe në përputhje me ligjin dhe etikën institucionale. Përdorimi i emrit tim në kontekste të tilla të pavërteta përbën cenim të integritetit tim profesional dhe personal.
Kërkoj nga të gjitha mediat dhe aktorët publikë që të përmbahen nga përhapja e dezinformatave dhe të respektojnë të drejtën time për një reputacion të pastër. Do të ndjek të gjitha hapat ligjorë të nevojshëm për të mbrojtur emrin dhe figurën time.
Sot gjeta emrin e mbiemrin tim në faqe portalesh me një akuzë sa të shëmtuar dhe të pavërtetë, trasmetuar nga ana juaj, në një konferencë për shtyp.
Kuptoj që jemi në kohë fushate por arritja politike e këtyre 30 vjeteve duhet t’iu kishte mësuar që për të mirën e vendit nëse ka sinjalizime për cënim të të drejtës së votës cilido nga ne duhet t’i drejtohet organeve kompetente e jo të valëviten nëpër konferenca për shtyp emra personash pa asnjë të keq njëlloj si në fletërrufetë e kohës së shkuar.
Duke qënë se kjo përdorje mediatike e personit tim ka prekur familjarët e të afërmit e mi në ditët në vazhdim do t’i drejtohem organeve kompetente”, shkruan ajo.
