Kur dëgjon deklaratat e kreut të PD Lulzim Basha dhe të drejtuesve të tjerë të opozitës që flasin për masat e qeverisë aktuale për përballimin e motit të keq dhe situatës së jashtëzakonshme të ngricave, do të mjaftojë thjeshtë një ballafaqim shifrash për të parë se janë vetëm deklarata hipokrite.
Vetëm 570 dollarë për të përballuar tërbimin e natyrës. Kaq para gjeti qeveria aktuale në shtator 2013 në fondin e emergjencave civile, i përdorur i gjithi për të financuar gjatë atij viti fushatën e Partisë Demokratike.
Bilanci i auditit të parë të bërë në Rezervën Shtetërore ishte ky:
- Vetëm 570 dollarë të lëna në fond
- 80 kilogramë sheqer, të shpërndarë në një thes plot dhe një thes tjetër përgjysmë
- Asnjë kilogram fasule, miell dhe grurë ndonëse me letra rezultonin mbi 40 tonë (të shitur me çmime tregu ose të shpërndarë për qoka elektorale)
- 16 milionë dollarë dëme të palikujduara që nga viti 1998
- Në tetë vite qeverisje, u dëmshpërblyen me vlerë jo të plotë për dëmet e përmbytjeve vetëm 1 200 familje, 1/3 e familjeve të prekura (paratë shpërndaheshin vetëm mbi baza klienteliste).
Për fat, në 2013-n natyra e përmbajti forcën e saj, e viti kaloi pa përmbytje apo kushte ekstreme të motit. Në rast të kundërt, nëse do të kishte pasur acar, thatësirë, përmbytje, shkarje dheu apo ndonjë tërmet shkatërrimtar, gjithë fondi që kishte shteti shqiptar për të tejkaluar situatën ishte as më shumë dhe as më pak se 600 mijë lekë të vjetra!!! /Lexo.al/a.m.
