Pas akuzave të Ministrit Tahiri dhe Kryeministrit Rama në adresë të gjyqtarit që pezulloi Haki Çakon, ka reaguar edhe unioni i Prokurorëve, i cili ka theksuar se sulme të tilla nuk janë të denja për personat që kërkojnë reformën në drejtësi.
“Klima e shantazhit dhe presionit publik ndaj prokurorëve dhe gjyqtarëve është jashtë logjikës së funksionimit normal të institucioneve shtetërore dhe kjo mënyrë komunikimi ndikon negativisht në luftën e përbashkët kundër kriminalitetit”, thuhet në reagim.
Unioni i Prokurorisë i i ka bërë dhe një thirrje faktorit ndërkombëtar.
“Të vetëdijshëm se detyra e prokurorit ne Republikën e Shqipërisë është një detyre e vështirë, kërkojmë me forcë mbështetjen e shtetit shqiptar, pjesë të të cilit jemi, për të kryer detyrën të pandikuar, pa presione politike dhe pa u shantazhuar në emër të Reformës në Drejtësi”, thuhet gjithashtu.
Ky Union shpreh edhe një tjetër shqetësim, atë të shmangies së tyre si palë në kryerjen e reformës në drejtësi.
“Në kohen kur diskutimet mbi reformën në drejtësi kaluan në nivel politik, konstatojmë me keqardhje se as ekspertët dhe as funksionarët e drejtësisë nuk konsiderohen më si pjesë e zgjidhjes dhe e bërjes së reformës. Në përfundim të këtij reagimi kërkojmë edhe një herë me forcë që drejtësia të lihet e qetë, që prokuroret te jenë të lirë të hetojnë si bëjnë çdo dite ne bashkëpunim me oficeret e policisë gjyqësore të policisë se shtetit, doganave, tatimeve dhe institucionet e tjera shtetërore”, përfundon reagimi./ a.k
