Ne faqet e para te disa mediave ka qarkulluar lajmi se ambasadorja e Delegacionit të BE-së Romana Vlahutin ka blerë një vilë luksoze të Delegacionit të BE-së në Tiranë në shumën e 1.6 milionë eurove. Sipas këtyre mediave në fillim të vitit 2015, biznesmeni L.D. dhe Vlahutin kanë rënë dakord për një kontratë qiraje me vlerë të këstit 8 mijë euro në muaj. Kjo kontratë parashikonte që Delegacioni i BE-së do paguante 8 mijë euro çdo muaj për shfrytëzimin e vilës, ndërsa Delegacioni kishte kohë 1 vit që ta blinte vilën. Sipas kësaj kontrate qiraje, nëse ndodhte që Delegacioni nuk do e blinte vilën për një vit, atëherë kishte detyrimin që të shfrytëzonte për 8 vite me qira vilën. Detyrimi vjetor i qirasë llogaritet në 96 mijë euro.
Kontrata-tip është ekspozuar nga kandidati për Avokat të Popullit, Altin Goxhaj, një eksponent ky i PD-së. Sipas tij, “kontratë tip është siguruar me USB nga burime të BE-së, nga zyrtarë korrektë që kanë interes në zbardhjen e kësaj afere”. Cmimi i qirasë i nënshkruar prej ambasadores Vlahutin, sipas mediave pranë opozitës, rezulton dyfish më i lartë nga mesatarja e tregut në bllokun rezidencial.
Por i menjëhershëm ka qenë dhe reagimi i Burkselit rreth këtyre akuzave. Zëdhënësja e BE, Maja Konçijançiç ka sqaruar për Report TV se “vendimi për të zgjedhur rezidencën e Kreut të Delegacionit të BE-së në Shqipëri erdhi si konkluzion i një analize tërësore, që përfshiu një vëzhgim të tregut, një vlerësim nga një ekspert i pavarur dhe këshillimin e Oficerit Rajonal të Sigurisë së EEAS (Shërbimit të Veprimit të Jashtëm Evropian) në lidhje me aspektet e sigurisë“.
“Ky ishte opsioni më i mirë lidhur me raportin e përgjithshëm cilësi/çmim dhe përmbushjen e nevojave të ndërtesës si rezidencë e Kreut të Delegacionit të BE-së, si siguria, lehtësirat dhe afërsia me Delegacionin e BE-së. Vendimi u miratua nga Autoriteti Buxhetor i BE-së në Janar 2015. Është e një rëndësie shumë të madhe për institucionet e BE-së që buxheti të jepet në mënyrë korrekte, transparente dhe me raportin më të mirë cilësi-çmim”, ka thënë zëdhënësja e BE-së, Konçijançiç.
ma.me
