Ambasada Britanike në vendin tonë ka reaguar ashpër ndaj akuzave të bëra në drejtim të kompanisë Crown Agents nga politikanë dhe komentues shqiptarë. Përmes një deklarate për mediat, ambasada britanike thekson se akuzat për korrupsion ndaj Crown Agents duhet të shoqërohen me prova konkrete.
Sipas ambasadës, Britani e Madhe e merr mjaft seriozisht veprën penale të korrupsionit, dhe në këtë drejtim kërkon që akuzat e bëra nga politika shqiptare që nga shtatori i vitit 2013 të shoqërohen me prova dhe fakte.
Ambasada britanike kujton se kompania Crown Agents, e kontraktuar nga qeveria shqiptare për shërbimet dhe kontrollet doganore, është një kompani serioze në të cilën punojnë mjaft ish-zyrtarë britanikë.
Në përfundim, nënvizohet se këto akuza që prej dy vitesh nuk janë shoqëruar me asnjë provë, çka do të thotë se janë të pavërteta dhe se nuk duhet të merren seriozisht nga opinioni publik.
“Gjatë ditëve të fundit, disa politikanë dhe komentues shqiptarë kanë artikuluar në shtypin e shkruar dhe atë elektronik, akuza të rënda për praktika korruptive ndaj një kompanie britanike, Crown Agents. Qeveria britanike i trajton çështjet e korrupsionit me shumë seriozitet. Korrupsioni në biznes, përfshirë edhe kompanitë britanike që punojnë jashtë Mbretërisë së Bashkuar klasifikohet si krim sipas UK Bribery Act (legjislacionit britanik mbi mitmarrjen). Çdo provë për korrupsion të kryer nga një kompani britanike duhet të sillet në vëmendjen e Policisë Britanike, qoftë drejtpërdrejtë, qoftë përmes kësaj Ambasade. Crown Agents është një kompani e respektuar britanike, e cila ka qenë më parë një agjenci e qeverisë britanike dhe shumë nga stafi i saj janë ish-zyrtarë të qeverisë. Një prej ministrave në qeverinë e tanishme është pjesë e Bordit Menaxhues të Crown Agents. Nga ana tjetër, politikanë të caktuar shqiptarë kanë hedhur vazhdimisht që prej shtatorit 2013, akuza për korrupsion ndaj Crown Agents. Gjatë gjithë kësaj kohe, ata asnjëherë nuk i kanë mbështetur akuzat e tyre me fakte konkrete. Në këto rrethana, gjëja e duhur për t’u bërë është ose faktimi akuzave ose tërheqja e tyre. Në fakt, duket qartë që këto akuza nuk janë të besueshme dhe duhet të mos merren parasysh nga Parlamenti dhe opinioni publik.” thekson ambasada britanike.
