Monika Kryemadhi ka me dhjetra hyrje-dalje të regjistruara në sistemin TIMS. Nga të dhënat e siguruara nga Voxnews.al, vetëm në vitin 2017 ish-kryetarja e LSI-së ka të regjistruara mbi 20 hyrje-dalje dhe një pjesë e tyre nuk është deklaruar në Inspektoriatin e Lartë të Pasurisë, siç e kërkon ligji.
Rruga e preferuar e Kryemadhit është ajo ajrore, por mes rasteve ka edhe një që e kalon kufirin në këmbë. Bëhet fjalë për rastin e regjistruar në sistem më 17 korrik të 2017-s në pikën e kalimit kufitarë të Qafë-Botës në Sarandë.
Mënyra e daljes nga vendi si këmbësore e Monika Kryemadhit, që në atë kohë kishte pak muaj që kishte marrë në dorë partinë pas zgjedhjes së Ilir Metës si President ngre dyshimet se ajo mund ta ketë përdorur këtë për të fshehur identitetin e personave me të cilët ka udhëtuar.
Është e vështirë të besohet se Kryemadhi ka udhëtuar me autobus, apo me makinë deri në doganë dhe pasi ka kaluar kufirin ka marrë autobusin, apo e priste një makinë tjetër. Skenari më i mundshëm është që Kryemadhi ka qenë në të njëjtin automjet me persona të tjerë dhe në pikën e kalimit kufitar është regjistruar si këmbësore për të mos u lidhur me personat në fjalë.
Kush, apo cilët janë këta persona dhe çfarë fshehu pas këtij udhëtimi e di Monika Kryemadhi, por rasti në fjalë shton edhe më tej provat se Ilir Meta dhe bashkëshortja e tij kanë përdorur kompani guackë për të transferuar para jashtë vendit.
Periudha përkon pak muaj pasi LSI ka lobuar përmes kompanisë Dorelita Limited në SHBA me një shumë prej të paktën 700 mijë eurosh. Dorelita Limited ka si përfaqësues në dokumentet e dorëzuar në Departamentin e Shtetit të SHBA, shtetasin grek Iraklis Fidetsiz.
Shuma e shpenzuar për lobim në SHBA nuk është deklaruar në raportet vjetore që LSI ka dorëzuar në Komisionin Qendror të Zgjedhjeve, ndërsa mister është edhe burimi i parave të përdorura për këtë lobim.
Në lidhje me këtë çështje ka shkruar edhe media më e madhe austriake, “Kronen Zeitung”, e cila duke renditur faktet e cilëson Ilir Metën si “thellësisht të korruptuar”.
Sa për udhëtimet e tjera të Monika Kryemadhit, destinacion mund të ketë qenë edhe San Marino, ku sipas padisë tjetër të dorëzuar në SPAK nga ana e avokatit Idajet Beqiri, ka kryer të paktën 287 mijë euro operacione estetike.
Kryemadhi e pranon se ka shpenzuar, por për çështje shëndetësore siç thotë ajo, duke shtuar se një pagesë e ka me Swift. Problemi është se Swift-i, si transfertë financiare nuk është deklaruar pranë në Inspektoriatin e Deklarimit të Pasurive, ashtu siç e detyron ligji./Voxnews.al
