Ministrja e Shtetit për Marrëdhëniet me Parlamentin, Elisa Spiropali, ka komentuar mbrëmjen e kësaj të enjteje akuzat e kryeministrit Rama për ish-deputeten demokrate, Grida Duma.
Spiropali ka theksuar në studion e Klan News se fotoja me të cilën Rama i’u referua Dumës, nuk ishte seksiste dhe se PS ka qenë një forcë politike që i ka promovuar gratë në nivelet më të larta.
Më tej ajo nuk i kurse sulmet për palën tjetër dhe presidentin Meta e zëdhënësin e tij, teksa u shpreh se është sulmuar personalisht nga ai.
Keni një koment për mënyrën se si kryeministri Rama i’u referua zonjës Duma?
Spiropali: Ne nuk bëjmë kurrë komente seksiste, ne nuk jemi marrë kurrë me kundërshtarët dhe familjet e tyre, ne nuk e përdorim gjuhën e dhunës, ne nuk e përdorim denigrimin e kundërshtarit si mjet, kanë katër vjet që ata e bëjnë nga fillimi në fund. Edhe sot me ministret, me kryeministrin, etj etj.
Ishte një karakterizim për kandidatët dhe për performancën e tyre politike. Kaq ishte. Unë nuk jam dakord me denigrimin e asnjë figure politike, dhe aq më shumë gratë. Ne kemi qenë viktima të vazhdueshme.
Duke qenë një forcë politike që i ka promovuar gratë në nivelet më të larta, kemi dëgjuar gjuhën e tyre denigruese, bulliste, seksiste, injorante të të gjithë shpurës së tyre, duke filluar nga presidenti Meta që kishte bërë sot një deklaratë hipokrite, ku gjoja mbronte zonjën Duma, ai që me zëdhënësin e tij që është një lehës me pagesë sulmon nga mëngjesi në darkë të gjtha gratë.
Më ka sulmuar mua personalisht, ka sulmuar ministren e Drejtësisë dhe ju nuk keni reaguar asnjëherë. Ne jemi kundër çdo llojë denigrimi, nuk ka qenë seksiste ajo. Mund të ishte bërë edhe për një burrë dhe për gjithkënd tjetër.
/a.r
