Akuzat e PD për lidhje të policisë me trafikantët, MPB: Jeni për keqardhje
Ministria e Punëve të Brendshme i është përgjigur akuzave të bërë nga Partia Demokratike se ka lidhje me trafikantët e drogës.
Ishte deputeti demokrat Flamur Noka i cili ka denoncuar sërish paraditen e së enjtes trafikun e narkotikëve nga Shqipëria drejt Italisë dhe lidhjet e trafikantëve me politikën, të përforcuara këtë herë nga deklaratat e një ish-oficeri policie për një të përditshme.
Në reagimin e MPB-së theksohet se policia shqiptare në 2 vitet e fundit ka arritur rezultate të pamenduara në luftën kundër narkotikëve, duke çrrënjosur njëherë e mirë konceptin e zonave të paprekshme.
“Nëse i konsideron vetëm disa rrënjë, mbi 630 mijë bimët e kanabisit të asgjësuara vetëm këtë vit nga Policia, në operacione nga Tropoja e Dukagjini e deri në Tepelenë e Korçë, ky është një problem të cilin nuk ia zgjidhim dot opozitës. E vetmja trashëgimi e Qeverisë së kaluar, ishin hartat me fotografitë e ofruara nga Policia italiane për mijëra parcela droge anë e mbarë vendit, për të cilat nuk ishte lëvizur as gishti për t’i shkatërruar. Sukseset e sotme të Policisë në luftën kundër drogës dhe krimit, tregojnë jo vetëm vullnetin e Qeverisë për të shënuar rezultate që qeveria e kaluar as i imagjinonte, por njëkohësisht tregon sa edhe sa të korruptuar, përtacë dhe protektorë të krimit kanë qënë ata që e drejtonin deri dje Qeverinë, MB dhe Policinë e Shtetit”, theksohet në njoftimin e MPB-së.
Në deklaratën e lëshuar nga dikasteri i drejtuar nga Saimir Tahiri theksohet se PD është bërë për keqardhje.
Redaksia Java News/ f.g
