Në një prej mediave shqiptare një ditë më parë u shpërnda një lajm sipas të cilit Ministri i Financave kishte shpenzuar për një udhëtim 670 mijë lekë vetëm për biletën. Në lidhje me këtë lajm reagoi edhe kreu i opozitës Lulzim Basha që akuzoi minsitrin për shpërdorim të fondeve.
Por pas akuzave publike ka ardhur reagimi i agjencisë së udhëtimit e cila ka dhënë disa detaje të reja që sipas saj hedhin poshtë pretendimet e kreut të PD.
Sipas Agjencisë në fjalë, ku është bërë dhe rezervimi i biletës së avionit pohon se shuma në total, (670 mijë lekë) bëhet fjalë për tre persona, dhe jo vetëm për ministrin. Përkatësisht, mësohet se në udhëtimin për në Vjenë ku u mbajt Panairi i Turizmit, Ahmetaj shoqërohej dhe nga dy këshilltarë të tij.
Sipas agjencisë, zyrtarët kanë qëndruar në një hotel për pesë ditë, ndërsa shuma e shpenzimeve ka qenë në total 670 mijë lekë, përfshi akomodim dhe biletat. Sakaq, bëhet e ditur se këto shpenzime punonjësja e thesarit i ka regjistruar si “shpenzime për biletë udhëtimi për ministrin Arben Ahmetaj”, ndërsa në fakt rezultojnë 3 fatura të likujduara në një urdhër xhirimi.
