Nënkryetari i Grupit parlamentar të PS dhe njëherësh deputeti i qarkut të Elbasanit Taulant Balla ka reaguar ndaj deklaratave të kreu të Partisë Demokratike Lulzim Basha. Ky i fundit nga Elbasani akuzoi kandidatin për kryetar të Bashkisë Elbasan Qazim Sejdini, për shpërdorim të kredisë së marrë, për shpronësimin e banorëve që u prekën nga prishja e banesave të tyre, nga rikonstruksioni i rrugës.
Por në reagimin e tij Balla shprehet se këto akuza janë qesharaka pasi paratë kanë shkuar të gjitha për shpronësim dhe për këtë mund të pyeten të gjitha familjet. Balla i ka rikujtuar Bashës akuzat për vjedhjen e 230 milionë eurove nga rruga e Kombit, kohë kur kreu i demokratëve ishte Ministër Transporti.
“Basha akuzoi dje në Elbasan, se gjoja për një kredi të marrë për shpronësime është ndarë përgjysmë mes kreut të Bashkisë dhe qeverisë, kjo është krejtësisht e pavërtetë. Si mund të ndahet një kredi përgjysëm ku çdo qindarkë e kësaj kredie është ndarë për shpronësimin e çdo familje të dëmtuara nga ndërtimi i rrugës. Ju ftojmë të gjithë bashkë të takojmë një për një familjet të cilët do të konfirmojnë se për shkak të ndërtimit të rrugës bashkia i dëmshpërbleu një për një me këto para. Nuk ka njeri tjetër veç Bashës, në Shqipëri që akuzohet për vjedhjen e 230 milion eurove, i gjetur fajtor nga prokuroria dhe ende i padënuar, i cili guxon të hedhë baltë mbi një figurë shumë të pastër, një njeri shumë të ndershëm, një bashkiak shumë të ndershme sic është bashkia e Elbasanit dhe Qazim Sejdini” , tha Balla.
