Deputetja e PS, Klotilda Ferhati i’u përgjigj akuzave të PD se Fatmir Xhafaj në cilësinë e kryetarit të Komisionit të Ligjeve ka ndërhyrë duke ndryshuar nene të Kodit të Procedurës Penale për t’i siguruar lirinë e përjetshme vëllait. Por, deputetja e PS thotë se kjo është një lajthitje e PD, pasi drafti integral i kaluar në komision është i njëjtë më atë që është votuar në Kuvend.
Sipas deputetes së PS kjo është e verifikueshme, pasi mjafton që të shikohen procesverbalet. Ferhati theksoi se madje në procesverbalin e mbledhjes së komisionit të Ligjeve nuk ka pasur asnjë rezervë për nenin e ekstradimit që po bëhet kaq shumë zhurmë. Deputetja e PS tha se është e vërtetë që ka ndryshuar Kodi i Procedurës Penale në lidhje me ekstradimin, por gjithçka është bërë sipas Konventës Europiane.
“Kjo është një lajthitje. Neni 491 në tekstin integral ka të njëjtën përmbajtje të Komisionit të Ligjeve që i kaloi Kuvendit. Është një lajthitje juristësh të thuash ka falsifikim. Kam pasur respekt për kolegët, por me atë që kanë bërë sot nuk u shkon, mund të kenë bërë vetë ndryshime të tilla për paragrafë, por nga 2013 e këtej….Kur të flasin për Xhafën të bëjnë kujdes, pasi është njeri i ligjit, ka qenë i drejtë në karrierën e tij dhe të flasin dy juristë me akuza të tilla është lajthitje.
Te versioni i pr/ligjit integral neni 491 ka pasur të njëjtën përmbajtje, pse është shtuar? Është shtuar sepse kemi aderuar në një konventë ndërkombëtare për ekstradimet, e cila lejon të kryhen ekstradime edhe kur personat gjykohen në mungesë me kusht që t’u jepet e drejta për një shkallë ankimi, me garancitë e një procesi të rregullt t’i zbatohen sipas akteve ndërkombëtare. Kjo është futur në nenin 491 për të pasur garancitë minimale për një proces të rregullt ligjor. Është futur për të garantuar cështjen e personave të dënuar në mungesë, kjo nuk i shërben një njeriu, por mbron liritë në procesin penal. Ndërkombëtarët kanë pasur rezerva? Nuk vura re të ketë pasur refuzim. Edhe PD nuk ka pasur rezerva. Në procesverbalin e komisionit nuk ka pasur asnjë kundërshtim nga PD. Janë këngë të vjetra kur opozitës i mbaron një kauz, por është e vjetër”, tha deputetja e PS, Klotilda Ferhati.
PD e ka rikthyer disa herë këtë cështje në vitet e fundit duke akuzuar ministrin e Brendshëm aktual Xhafaj, i cili deklaroi dje se kjo është një cështje e para 15 viteve të vëllait të tij, Agron Xhafaj që nuk e implikon aspak qeverinë. Raport.tv
ma.me
