Kryetari i Partisë Demokratike Lulzim Basha i ka bërë sërish thirrje qeverisë që të anulojë draftin për futjen e TVSH-së tek biznesi i vogël.
Duke folur për mediat pas mbledhjes së grupit parlamentar demokrat, Basha tha se vendosja e TVSH-së për biznesin e vogël do të ketë pasoja negative.
“Pse ekspertët e tij janë kundër tvsh-së te biznesi i vogël? Pse FMN është kundër? Futja e TVSH-së tek biznesi i vogël do të rrisë çmimet, do të shkatërrojë vende pune”, tha Basha.
Kryedemokrati sulmoi Kryeministrin duke thënë se oligarkët i shërbejnë qeverisë.
“I kam bërë thirrje të tregojë se sa kontribuojnë oligarkët me të cilët rri ai, nuk kam marrë përgjigje sepse Edi Rama promovon oligarkët. Propozimi ynë është që biznesi i vogël të mos paguajë tvsh. Nëse këta thonë që paska oligarkë që maskohen me biznese të vogla, atëherë çfarë përgjegjësie mbajnë këta për aksionet anti-informalitet. Oligarkët nuk fshihen te biznesii vogël, por te paradhomat e kryeministrisë”, u shpreh Lulzim Basha.
Gjatë fjalës së tij Basha i është referuar arrestimit të të shumëkërkuarit Durim Keci dhe ka thënë se në dijeninë e tij dhe PD, persona me imunitet kanë ndërhyrë për ti bërë presion policisë për lirimin e tjj.
“Beteja jonë për shkëputjen e lidhjes krim-shtet do të vazhdojë, ftojmë gjithë gazetarët kurajozë në këtë betejë. Gazetari Artan Hoxha bëri me dije se pas arrestimit të Durim Kecit persona me imunitet i bënë presion policisë, në dijeninë tonë është kryetari i bashkisë së Durrësit, Vangjush Dako dhe një deputet i PS-së”- tha Basha.
