Pas akuzave të opozitës se për llogari të deputetit të PS Sadri Abazi, është dhënë leje për një shtesë në pallatin në pronësi të tij, ka reaguar IKMT, duke sqaruar se është ironike sesi PD dhe Lulzim Basha akuzojnë për diçka, kur dihet se leja është dhënë në vitin 2012, kur në krye të bashkisë së kryeqytetit ishte vetë lideri i opozitës.
Inspektorati Kombëtar i Mbrojtjes së Territorit përmes reagimit për shtyp shkruan se akuzat e Bashës janë qesharake.
“Nuk jemi të çuditur nga sulmi i Partisë Demokratike lidhur me një shtesë kati të realizuar në vitin 2012 kur kryetari i PD Lulzim Basha ishte kryetar bashkie dhe Tirana ishte vatra më e nxehtë e ndërtimeve pa leje!
Sepse nuk është hera e parë që ish-kryetari i bashkisë sulmon dhe përbalt punën e Inspektoratit Kombëtar të Mbrojtjes së Territorit. E vërteta është se shtesa në fjalë është e legalizuar dhe ndërtimi për të cilin akuzon, apo më saktë shpif Partia Demokratike, është një rikonstruksion me të gjith dokumentacionin përkatës, ku nuk ka asnjë metër katror shtesë në volumet e godinës që gjendet e regjistruar në Hipotekën e Tiranës. Kështu që duke e ftuar opozitën të kontribuojë në denoncimin e rasteve të rralla të ndërtimeve pa leje, hedhim poshtë pretendimin e saj në këtë rast. Qëllimet politike të opozitës nuk janë arsye për të shpifur e hedhur baltë mbi institucionet.”- shkruhet ne reagimin e IKMT.
AKUZA E BASHËS
“Në këto momente, një shkelje brutale e ligjit po ndodh në mes të Tiranës me lejen e Edi Ramës. Edhe pse godinat e paligjshme të oligarkut të tij Sadri Abazi tek Zogu i Zi, kanë vendim prishje, ai për 3 ditë ka shtuar një kat të tërë pa leje, dhe sot ka ngrehur skelat e po i vesh me xham, – shkruan Basha. – Mijëra njerëz kanë hyrë në burg këto tre vite dhe janë edhe sot në qeli për një avlli pa leje, apo një rregullim tjegullash. Po Sadriun pse nuk e zë ligji? Sepse nuk ka ligj, ka sundim bande me dy standarde. Banda që qeveris bën ç’të dojë, të sunduarit, shqiptarët janë të ndaluar. Kjo padrejtësi duhet të marre fund. Banda e Edi Ramës duhet shkulur me çdo çmim. Dhe kjo do ndodhe shumë shpejt. Shqipëria më mire pa Edi Ramën”./java/a.k