“Ju lutem na ndihmoni… është shumë e vështirë të jetosh në Gjermani si një vajzë sot. Jemi shumë të frikësuara kudo, madje edhe kur dalim me familjen apo edhe kur shkoj të shoh në kinema film me shoqet. Zakonisht kthehem në shtëpi para orës 18:00 të mbrëmjes dhe është shumë e frikshme”. Me këto fjalë i drejtohet një vajzë 16-vjeçare kancelares Merkel, në një video të publikuar në internet, e cila po bën xhiron e botës.
“Faleminderit Angela Merkel që po vret Gjermaninë”, shprehet Bibi Wilhailm, duke iu referuar politikës së dyerve të hapura për refugjatët të cilën Angela Merkel e ka aplikuar në Gjermani.
Në videon, e cila është censuruar si një fjalim urrejtjeje anti-mysliman, vajza rrëfen disa raste incidentesh me refugjatët që vijnë nga Lindja e Mesme.
“Nuk e kuptoj përse ata i bëjnë këto veprime, por më shumë nuk kuptoj faktin pse Gjermania thjesht po rri e po qëndron duarkryq pa bërë asgjë?! Politikanët jetojnë nëpër vilat e tyre luksoze, pinë kokteile dhe nuk bëjnë asgjë. Unë nuk e di në cilën botë jetojnë ata, por ju lutem, ju lutem na ndihmoni!”, përfundon vajza.
Thirrja e 16-vjeçares vjen në një moment kritik për pozicionin e Angela Merkel, ku analistët thonë se pozita e kancelares është tronditur fuqishëm.
