Kievi u zgjua të dielën nën furinë e sulmeve të rënda ruse me dronë dhe raketa. Monitoruesit e pavarur e quajtën atë një nga sulmet më të mëdha ruse në kryeqytetin e Ukrainës dhe rajonin përreth që nga fillimi i luftës në shkallë të plotë. Dronët fluturuan mbi qytet dhe reagimi kundërajror u dëgjua gjatë gjithë natës. Sulmi vazhdoi në orën 7:20 të mëngjesit të së dielës
Administrata ushtarake e Kievit tha se të paktën gjashtë persona ishin plagosur që nga ora 04:40 e mëngjesit.
Disa banorë ikën në stacionet e metrosë thellë nën tokë për siguri. Shumë rajone në të gjithë vendin ishin nën alarm ajror. Raportohet se sulmet ajrore ruse plagosën tre persona në Kiev dhe katër në qytetin e Zaporizhzhisë, njoftuan autoritetet të shtunën në mbrëmje. Këshilltari kryesor i Presidentit Volodymyr Zelensky, Andriy Yermak, foli për sulme me dronë dhe raketa. Tre personat e plagosur në kryeqytet janë shtruar në spital, tha kryebashkiaku Vitali Klitschko. Qyteti i Zaporizhzhisë në juglindje u godit “të paktën katër herë”, sipas guvernatorit rajonal Ivan Fedorov, i cili konfirmoi katër të plagosur.
Sakaq, Polonia ngriti në ajër avionët e saj për të garantuar sigurinë e hapësirës ajrore pasi Rusia nisi sulmet ndaj Ukrainës, njoftuan Forcat e Armatosura Polake. Sipas të dhënave të Forcave Ajrore të Ukrainës, që nga ora 03:00 GMT (5:00 GMT), i gjithë territori i Ukrainës ishte nën gatishmëri për siguri ajrore.
“Në lidhje me aktivitetin e aviacionit me rreze të gjatë veprimi të Federatës Ruse, i cili po kryen sulme në territorin ukrainas, avionët polakë dhe aleatë kanë filluar të operojnë në hapësirën tonë ajrore”, thuhet në një postim në X. Operacionet u përcaktuan si parandaluese, që synonin sigurimin e hapësirës ajrore dhe mbrojtjen e qytetarëve.
Në përgjigje të incidenteve me dronë në Danimarkë, NATO ka njoftuar një rritje të pranisë së saj në Detin Baltik. NATO i tha agjencisë së lajmeve Reuters se vigjilenca do të rritet duke përdorur mjete të ndryshme. Këto përfshijnë, sipas raportit, një fregatë të mbrojtjes ajrore dhe asete zbulimi të paspecifikuara. Kjo do të përforcojë misionin e NATO-s “Baltic Sentry”, i cili u nis në janar për të mbrojtur infrastrukturën kritike siç janë kabllot nëndetëse dhe tubacionet e gazit.
