Kryetari i Partisë Demokratike, Sali Berisha, e konsideron si akt provokues mbajtjen sekret të materialeve që Prokuroria e Posaçme ka dërguar në Kuvend për kërkesën për Belinda Ballukun. Gjatë mbledhjes së Këshillit Kombëtar të Partisë Demokratike, Berisha u shpreh se kryeparlamentari ka mashtruar përfaqësuesit e selisë blu. Sipas tij, materialet janë sekret, por jo për anëtarët e Këshillit për Rregulloren, Imunitetin dhe Mandatet dhe deputetët e Kuvendit.
“Prokuroria dërgon në parlament kërkesën për heqjen e imunitetit dhe arrestimin e lubisë. Prisni. Prokuroria ka dërguar me qindra dokumente. Ligji dhe vetë prokurori ato ia adreson si kryetarit dhe çdo deputeti të parlamentit. Edi Rama urdhëron Niko Peleshin dhe ai ndryn në kasafortë, fillimisht mashtron dhe u thotë përfaqësuesve tanë se ka kërkuar prokurori që të mbahen sekret. Sigurisht që janë sekret ato, por nuk mund të jenë kurrë sekret për anëtarët e Këshillit për Rregulloren, Imunitetin dhe Mandatet dhe për asnjë deputet. Pse janë sekret? Sepse aty del Rama me gjithë porositë e tij.
Shiko ç’akt provokativ. Rrezikohet të mos na japin dokumentet. Duan të mbajnë duke fshehur vjedhjet, duan të mbajnë duke fshehur krimet”, tha Berisha.
Ndërkohë Kuvendi, në një deklaratë po sot, 17 dhjetor, tha se aktet u janë vënë në dispozicion anëtarëve të Këshillit për Mandatet dhe Imunitetin.
“Materiali me karakter “sekret hetimor” ndodhet në kasafortën e specialistit të protokollit për dokumentacionin e klasifikuar”, sqaroi Kuvendi.
Kujtojmë se dje, 16 dhjetor, SPAK iu drejtua Kuvendit të Shqipërisë me kërkesën për autorizim, për heqjen e imunitetit të Ballukut e më tej kalimin në masë shtrënguese ndaj saj.
SPAK argumenton se Balluku është e pandehur për “shkelje të barazisë në tendera”, në kuadër të hetimeve për Tunelin e Llogarasë. Përveç kësaj, shton, se ajo është nën hetim për shtatë procedura të tjera prokurimi.
Pas kërkesës në Kuvend është vendosur që Këshilli për Rregulloren, Mandatet dhe Imunitetit ta shqyrtojë atë më 19 dhjetor. Sipas rregullave, Balluku ka të drejtë të japë shpjegime, të përfaqësohet nga avokati dhe të ushtrojë të plotë të drejtën e mbrojtjes gjatë mbledhjes.
