Një person është arrestuar këtë të premte në lagjen Schaerbeek të Brukselit, në një operacion të policisë belge. Personi, ndryshe nga sa u tha më herët nëpër media, nuk është i shumëkërkuari Mohamed Abrini, bashkëpunëtor i Salah Abdeslam. Sipas të dhënave të fundit, personi i dyshuar është qëlluar nga policia në përpjekje për t’u larguar dhe si pasojë ka mbetur i plagosur tek këmbët.
Megjithatë, i ndaluari, sipas autoriteteve belge, është një “peshk i madh” në rrjetin e xhihadistëve përgjegjës për sulmet e pak ditëve më parë në Bruksel.
Operacioni i zhvilluar në Schaerbeek është i lidhur me një aksion të ngjashëm të zhvilluar një ditë më parë në Paris, që çoi në parandalimin e një atentati. Gjatë operacionit të sotëm, tregtarët e zonës kanë deklaruar për mediat se janë trembur nga të shtënat dhe një shpërthim që është dëgjuar përreth.
Mediat belge: Tjetër shpërthim në Bruksel gjatë një operacioni anti-terror
Një shpërthim ka ndodhur gjatë një operacioni anti-terror në rajonin e Schaerbeek në Bruksel, raportojnë mediat belge.
Gjatë këtij aksioni një person është neutralizuar nga policia belge. Forca të shumta policie kanë mbërritur në vendngjarje. Operacioni u zhvillua afër sheshit Meiser.
Nuk dihet nëse shpërthimi është sulm terrorist apo jo. Mbrëmjen e së enjtes policia arrestoi 6 persona si të dyshuar për sulmet e së martës, ndërsa një shtetas francez u arrestua në Paris.
3 ditë më parë Brukseli u godit nga dy sulme terroriste në aeroportin e Zaventem dhe metronë e Maelbeek. Shqiptarja.com
