Aksidentoi për vdekje policin Ervin Haxhia në aksin Kamëz-Tiranë, përfundon në gjyq me dy akuza Arnold Kola. Prokuroria e Tiranës sqaron se ka përfunduar hetimet dhe depozituar në gjykatë kërkesën me dy akuza, atë të aksidentit me pasojë vdekjen dhe shkeljen e rregullave të qarkullimit rrugor.
Kola u arrestua mbrëmjen e 26 shtatorit 2016 pasi duke drejtuar automjetin e tij në gjendje të dehur dhe me shpejtësi 140 km/h përplasi patrullën e policisë së komisariatit 5 e për pasojë humbi jetën efektivi Haxhia.
Ngjarja
Një mjet fuoristrade “Lexus” teksa levizte me shpejtësi të madhe ka tentuar të parakalojë furgonin e policisë që ishte gjithashtu në lëvizje, të ngadaltë, por në një moment e ka goditur atë. Si pasojë e goditjes, furgoni i policisë ka pësuar dy rrotullime në vend, ndërsa mjeti tjetër për shkak të shpejtësisë së madhe ka humbur kontrollin.
Në këtë moment, makina ka goditur sërish furgonin, kësaj here me forcë të madhe. Dëshmitarët në vendngjarje thonë se si pasojë e përplasjes së fortë, tre punonjësit e policisë kanë dalë nga xhamat e furgonit, i cili goditi një mjet tjetër me targe AA231KU, tip BMV, e cila ndodhej e parkuar në rrugë.
Mediat raportuan nga vendngjarja, se mjeti tip fuoristradë me targë TR 8788 T, lëvizi edhe pak metra më tej për shkak të shpejtësisë, duke u përplasur me një shtyllë. Por drejtuesi i mjetit, që shkaktoi aksidentin, Arnold Kola 22 vjeç, i shpëtoi goditjes pa lëndime. Mësohet se 22-vjecari i dehur është djali i ish-deputetit të Partisë Socialiste Ndue Kola të qarkut Shkodër i zgjedhur në vitin 2009.
Aksidenti ka rezultuar fatal për njërin nga punonjësit e policisë, Ervin Haxhiajn, i cili humbi jetën gjatë rrugës për në spital. Ndërsa dy policët e plagosur, Besmir Voi, dhe Neil Hoxha, ndodhen në spitalin e Traumës për të marrë trajtimin e nevojshëm ku mësohet se njëri prej tyre është në gjendje të rëndë. /ma.me
