Gjykata e Tiranës ka dënuar me 5 vite burg shtetasen Uarda Çota, e cila aksidentoi për vdekje djalin 11-vjecar të Avenir Pekës, ish zëvendës ministër i Brendshëm.
Vendimi është dhënë në seancën e sotme në ngarkim të Çotës, ndërkohë që organi i akuzës kishte kërkuar dënimin e saj me 8 vjet heqje lirie.
Sipas të dhënave nga gjykimi i çështjes, Prokuroria akuzon të pandehurën për shkelje të rregullave të qarkullimit, pasi ka qenë duke qarkulluar me shpejtësi 85 kilometra në orë në segmentin e rrugës te “Komuna e Parisit”, me makinën “Mercedes Benz” me targa EN 07 XNR.
Makina e drejtuar nga Çota ka goditur nga pas automjetin “BUICK” me targa AA 200 AR. Sipas akuzës, veç faktit se ka qenë me shpejtësi mbi normën e lejuar, shtetasja Uarda Çota ka shkaktuar aksidentin me anë të goditjes së makinës, që ndodhej para saj, duke sjellë pasojat e aksidentit të rëndë.
Nga aksidenti humbi jetën i mituri R.P., ndërsa janë plagosur edhe disa persona të tjerë. Sipas akuzës, Uarda Çota është kontrolluar dhe në momentin e aksidentit ka pasur 0.88 përqindje alkooli për litër në gjak.
